سرینگر//
جنوبی ضلع اننت ناگ میں پولیس نے رہائشی مکان کی تلاشی کے دوران۲۷ء۹کلو چرس پاوڈر اور۸۶۷شراب کی بوتلیں برآمد کرکے ضبط کیں۔
پولیس کے ایک ترجمان نے بتایا کہ اننت ناگ پولیس کو مصدقہ اطلاع موصول ہوئی کہ ایک کنبہ غیر قانونی طورپر شراب فروخت کرنے اور ممنو ع نشیلی اشیائکے کاروبار میں ملوث ہے ۔
ترجمان نے بتایا کہ محمد رمضان گنائی ولد غلام رسول گنائی، شہزادہ اختر زوجہ محمد رمضان گنائی، زبیر رمضان گنائی ولد محمد رمضان گنائی ساکنان سیر ہمدان مٹن اننت ناگ غیر قانونی طورپر شراب اور چرس پاوڈر فروخت کرنے کے کاروبار میں ملوث ہیں۔
ترجمان نے بتایا کہ باوثوق ذرائع سے پولیس کو پتہ چلا کہ کنبے نے رہائشی مکان کے صحن میں کمین گاہ بنائی ہے جہاں پر انہوں نے شراب اور ممنوع نشیلی اشیاء کا ذخیرہ جمع کیا ہے ۔
پولیس نے معاملے کی نسبت ایف آئی آر زیرنمبر۲۰۲۴/۴کے تحت کیس درج کرکے تحقیقات شروع کی۔انہوں نے مزید بتایا کہ اننت ناگ پولیس اور ایگزیکٹیو مجسٹریٹ کی سربراہی میں ایک کمیٹی تشکیل دی گئی جنہوں نے رہائش مکان پر چھاپہ مارا ۔
معلوم ہوا ہے کہ رات بھر رہائشی مکان کی تلاشی کے دوران پولیس ٹیم نے۲۷ء۹کلو گرام چرس پاوڈ ر اور۸۶۷شراب کی بوتلیں برآمد کرکے ضبط کیں۔
پولیس نے میاں ، بیوی اور اس کے فرزند کو دھر دبوچ کر سلاخوں کے پیچھے دھکیل دیا۔پولیس نے رہائشی مکان سے ایک سیوفٹ گاڑی ، بالنو گاڑی ، موٹر سائیکل اور نقدی تیرہ ہزار۳۲۵روپے بھی تحویل میں لئے ۔
دریں اثنا پولیس نے عوام الناس سے ایک دفعہ پھر اپیل کی ہے کہ وہ منشیات اور غیر قانونی طورپر شراب فروخت کرنے والوں کے بارے میں پولیس کو مطلع کریں۔پولیس کا کہنا ہے کہ منشیات کے غیر قانونی کاروبار میں ملوث افراد کے خلاف سخت کارروائی عمل میں لانا اب ناگزیر بن گیا ہے ۔