سرینگر//
آل جموں اینڈ کشمیر ٹرانسپورٹز کنفیڈریشن کی جانب سے ٹرانسپورٹ کی ہڑتال کال کو فی الحال موخر کر دیا گیا۔
واضح رہے کہ ہٹ اینڈ رن کے نئے قانون کے لیے ٹرانسپورٹز کنفیڈریشن نے ڈرائیورس کیلئے اسٹیئرنگ چھوڑو آندولن کی دو روز یعنی ۹جنوری سے ۱۰جنوری کو کال دی تھی،تاہم ٹرانسپورٹرز نے ایک دن بعد ہی کال کو واپس لینے کا فیصلہ کرتے ہوئے ڈرائیورس کو اپنے معمول کے کام کاج پر لوٹنے کی اپیل کی ہے۔
آل جے اینڈ کے ٹرانسپورٹز کنفیڈریشن کے چیف آرگنائزر عابد علی دین اور جنرل سکریٹری شبیر احمد گنائی نے کہا کہ مرکزی وزارت ٹرانسپورٹ کی جانب سے یقین دہانی کے بعد ہڑتال کی کال کو فی لحال موخر کر دیا گیا۔
انہوں نے کہا کہ انہیں سرکار کی جانب سے یقین دہانی کرائی گئی کہ اس نئے قوانین میں ترمیم یا نئے قوانین لاگو کرنے سے قبل ٹرانسپورٹ ایسوسی ایشن کو اعتماد میں لیا جائے اور انہیں باخبر کرنے اور ان کے ساتھ مشاورت کے بعد ہی نئے قوانین کی عمل آوری کو یقینی بنایا جائے گا۔
واضح رہے کہ حال ہی میں مرکزی سرکار کی جانب سے ٹریفک قوانین میں ترمیم کرنے کو کہا گیا تھا۔
متعلقہ قوانین کی دفعہ۱۰۲؍ اور۱۰۶ کے تحت ہٹ اینڈ رن کیس میں ملوث ڈرائیور کو ۱۰سال قید اور سات لاکھ روپے جرمانہ کی سزا ہو سکتی ہے،جس کے بعد ملکی سطح پر ٹرانسپورٹرز نے سرکار کے اس اقدام پر اپنی سخت ناراضگی کا اظہار کیا۔