وادی میںخشک سالی کے بعد ۱۲ جنوری کو بارشیں اور برفباری کا امکان

سرینگر//
وادی کشمیر میں جاری خشک موسم کے بیچ۱۲ جنوری کو محکمہ موسمیات نے بارش اور برفباری کی پیش گوئی کی ہے۔
سرما کے رواں سیزن میں نومبر ماہ میں درمیانی درجہ کی بارش اور برفباری ہوئی تھی، تاہم دسمبر سے اب تک موسم مکمل خشک رہا ہے۔ خشک موسم کی وجہ سے سردی کی شدت بڑھتی جا رہی ہے جبکہ ہر روز صبح کے اوقات میں گھنے کہرے کے سبب لوگوں کو عبور و مرور میں سخت مشکلات درپیش ہیں۔
کشمیر میں اب تک کے خشک سرما سے لوگ کافی پریشان ہوچکے ہیں، اور لوگوں کا کہنا ہے کہ برفباری اور بارش نہ ہونے سے آنے والے سیزن کی کاشتکاری کے علاوہ ماحول پر بھی منفی اثرات مرتب ہوں گے۔ تاہم محکمہ موسمیات کے ڈائریکٹر مختار احمد نے بتایا کہ۱۲ جنوری سے برفباری اور بارش کا امکان ہے‘ جس سے خشک موسم سے نجات مل سکتی ہے اور کہرہ بھی غائب ہو جائے گا۔
احمد نے مزید بتایا کہ رواں سرما بالخصوص دسمبر سے جموں کشمیر میں اس نوعیت کی برفباری اور بارش نہیں ہوئی ہے۔ یہ خشک موسم ۱۰ جنوری تک رہ سکتا ہے اور اسکے بعد موسم میں تبدیلی کا امکان ہے۔ اس سے قبل بھی کشمیر میں سرما خشک رہا ہے اور ماضی قریب میں ہی کئی ایسی مثالیں ہیں جب سرما تقریباً پوری طرح سے خشک رہا ہے۔
اس دوران محکمہ موسمیات کے ایک ترجمان کے مطابق گرمائی دارلحکومت سرینگر میں کم سے کم درجہ حرارت منفی۸ء۴ڈگری سینٹی گریڈ ریکارڈ کیا گیا جو معمول سے۷ء۲ڈگری سینٹی گریڈ کم ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۸ء۳ڈگری سینٹی گریڈ ریکارڈ کیا گیا جو معمول سے۲ء۳ڈگری سینٹی گریڈ زیادہ ریکارڈ ہوا تھا۔
ایک اورسیاحتی مقام پہلگام میں کم سے کم درجہ حرارت منفی۶ء۶ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۲ء۶ڈگری سینٹی گریڈ ریکارڈ ریکارڈ ہوا تھا۔
شمالی کپوارہ میں کم سے کم درجہ حرارت منفی۳ء۵ڈگری سینٹی گریڈ ریکارڈ کیا گیا جو معمول سے۸ء۲ڈگری سینٹی گریڈ کم ریکارڈ ہوا تھا۔
قصبہ قاضی گنڈ میں کم سے کم درجہ حرارت منفی۶ء۴ڈگری سینٹی گریڈ ریکارڈ کیا گیا جو معمول سے۸ء۱ڈٖگری سینٹی گریڈ کم ریکارڈ ہوا تھا۔
لداخ یونین ٹریٹری کے ضلع لیہہ میں کم سے کم درجہ حرارت منفی۴ء۱۲ڈگری سینٹی گریڈ اور ضلع کرگل میں کم سے کم درجہ حرارت منفی۷ء۱۰ڈگری سینٹی گریڈ جبکہ قصبہ دراس میں کم سے کم درجہ حرارت منفی۰ء۱۴ڈگری سینٹی گریڈ ریکارڈ ہوا ہے ۔
محکمہ موسمیات کے مطابق وادی کشمیر میں۷ جنوری تک موسم وسیع پیمانے پر خراب ہونے کا کوئی امکان ہے ۔انہوں نے کہا کہ وادی میں اگلے چوبیس گھنٹوں کے دوران موسم خشک رہنے کا امکان ہے ۔
ترجمان کا کہنا تھا کہ وادی میں۴؍اور۵جنوری کو موسم ابر آلود رہ سکتا ہے اور اس دوران پہاڑی علاقوں میں کہیں کہیں برف باری متوقع ہے ۔انہوں نے کہا کہ بعد ازاں وادی میں۷جنوری تک موسم خشک رہنے کا امکان ہے تاہم۸جنوری کو موسم ابر آلود رہ سکتا ہے اور اس دوران پہاڑی علاقوں میں کہیں کہیں ہلکی بارشیں یا برف باری کا امکان ہے ۔