آئی جی کا بانڈی پورہ دورہ، سیکورٹی صورتحال کا جائزہ

سرینگر//
انسپکٹر جنرل آف پولیس ‘وی کے بردی نے ہفتے کے روز شمالی کشمیر کے ضلع بانڈی پورہ میں ایک سیکورٹی میٹنگ کی صدارت کرکے تازہ ترین سیکورٹی صورتحال کا جائزہ لیا۔
آئی جی نے آفیسران کو ہدایت دی کہ وہ سماج دشمن عناصر کے منصوبوں کو ناکام بنانے کی خاطر پیشگی اقدامات کریں۔
پولیس کے ایک ترجمان نے بتایاکہ آئی جی پی بردی نے بانڈی پورہ میں منعقدہ ایک میٹنگ کے دوران سیکورٹی صورتحال کا جامع جائزہ لیا۔انہوں نے کہا کہ میٹنگ کے دوران ضلع کے سیکورٹی منظر نامے کے حوالے سے مختلف امور زیر بحث آئے۔
ترجمان کا کہنا تھا کہ آئی جی پی نے ضلع کو درپیش موجودہ سیکورٹی خطرات و چیلنجز کی تشخیص پر زور دیا۔پولیس بیان کے مطابق بردی نے افسروں اور قانون نافذ کرنے والے اداروں کو ہدایت دی کہ وہ کسی بھی سیکورٹی واقعے سے نمٹنے کیلئے فوری کارروائیوں کو یقینی بنائیں۔
پولیس بیان میں کہا گیا’’آئی جی پی نے مجموعی سیکورٹی صورتحال کے استحکام کیلئے مختلف قابون نافذ کرنے والے اداروں کے درمیان مضبوط تعاون ہونے پر زور دیا‘‘۔انہوں نے کہا کہ آئی جی پی نے سیکورٹی ایجنسیوں اور عوام کے درمیان تعاون اور اعتماد کی بنیادوں پر مثبت تعلقات قائم کرنے کے احکامات صادر کئے۔
بیان کے مطابق انہوں نے انٹیلی جنس شیئرنگ میکانزم کو مزید مضبوط بنانے پر زور دیا۔انہوں نے موجودہ سیکورٹی انفرا سٹرکچر اور صلاحیتوں کو بڑھانے کی خاطر جدید ٹیکنالوجی کا سہارا لینے کا بھی فرمان جاری کیا۔
آئی جی کشمیر نے ٹیکنیکی صلاحیتوں کے ساتھ ساتھ ہیومن انٹیلی جنس کو مزید وسعت دینے کے احکامات صادر کئے تاکہ سماج اور ملک دشمن عناصر کے منصوبوں کو ناکام بنایا جاسکے۔انہوں نے آفیسران پر زور دیا کہ وہ موجودہ صورتحال پر گہری نظر گزر رکھیں اور پر امن حالات میں رخنہ ڈالنے والے افراد کی نشاندہی کرکے ان کے خلاف قانونی کارروائی عمل میں لائے۔
بردی نے میٹنگ کے دوران منشیات کا قلع قمع کرنے کی خاطر اٹھائے جارہے اقدامات کے بارے میں آگاہی حاصل کرتے ہوئے بتایا کہ قانون نافذ کرنے والی ایجنسیاں منشیات کے نیٹ ورک کو ختم کرنے کی خاطر آپریشنز میں مزید تیزی لائیں۔
میٹنگ میں ڈی آئی جی بارہ مولہ وویک گھپتا، ایس ایس پی بانڈی پورہ لکشے شرما ، ایس پی بانڈی پورہ سندیپ بٹ کے علاوہ دوسرے سینئر آفیسران نے شرکت کی۔