جموں و کشمیر میں۱۱ماہ میں ریکارڈ ۲کروڑ سیاح آئے

نئی دہلی//
حکومت نے آج راجیہ سبھا میں بتایا کہ اس کی پالیسیوں نے جموں و کشمیر میں سیاحت کے شعبے کو مضبوط کیا ہے اور اس سال صرف ۱۱مہینوں میں ریکارڈ دو کروڑ سیاحوں نے مرکز کے زیر انتظام علاقے کا دورہ کیا ہے ۔
وزیر سیاحت جی کشن ریڈی نے جمعرات کو راجیہ سبھا میں ضمنی سوالات کے جواب میں کہا کہ آرٹیکل ۳۷۰ہٹائے جانے کے بعد رواں سال کے آخری۱۱مہینوں میں دو کروڑ سیاحوں نے جموں و کشمیر کی سیاحت کی ، جو کہ تاریخ میں ایک ریکارڈ ہے ۔
وزیر اعظم نریندر مودی کی ایوان میں موجودگی کے دوران ریڈی نے کہا کہ مودی پوری دنیا میں ہندوستان کے سیاحت کے سفیر ہیں۔ وہ جس ملک کا بھی دورہ کرتے ہیں‘وہ خاص طور پر ہندوستان میں سیاحت کے بے پناہ مواقع کے بارے میں بات کرتے ہیں۔
ریڈی نے کہا کہ ملک میں حال ہی میں ختم ہونے والی جی۲۰سربراہی کانفرنس کے دوران ہندوستان میں سیاحت کے امکانات پر خصوصی توجہ دی گئی اور ملک بھر میں کانفرنس کے اجلاس منعقد کیے گئے ۔ انہوں نے کہا کہ اس کانفرنس کے مثبت نتائج میں سے ایک یہ ہے کہ ملک کے سیاحتی شعبے کو بھی اس سے خاطرخواہ فائدہ ہوا۔
ایک دیگر سوال کے جواب میں مرکزی وزیر سیاحت نے کہا کہ حکومت ہند اب ملک میں ہوٹل نہیں کھول رہی ہے بلکہ یوتھ ٹورازم کلبوں کو فروغ دے رہی ہے ۔ انہوں نے کہا کہ اب تک ملک کے مختلف اداروں میں۳۵ہزار یوتھ ٹورازم کلب کھولے جا چکے ہیں۔