’ ترقی کیلئے امن شرط اول ہے ‘…’ جموں کشمیر کے تاریک دور نے ہمارے نوجوانوں کے مستقبل کو تباہ کیا‘

جموں//
لیفٹیننٹ گورنر‘منوج سنہا نے کہا ہے کہ کسی بھی ترقی پسند معاشرے کی ترقی کیلئے امن شرط اول ہے ۔
سنہا جموں و کشمیر بھارت سکاؤٹس اینڈ گائیڈز کے ایک وفد سے بات کررہے تھے‘ جس نے انہیں فلیگ سٹیکر پیش کیا ۔
لیفٹیننٹ گورنر نے کہا کہ ترقی پسند معاشرے کی ترقی کے لئے امن اوّلین شرط ہے۔ ان کاکہنا تھا’’بھارت سکاؤٹس اینڈ گائیڈز کے رضاکاروں کو دُنیا بھر میں امن کا پیغام پھیلانا چاہئے، سماجی خیر سگالی کے جذبے کے ساتھ کام کرنا چاہئے اور وِکست بھارت کے سفر میں اَپنا حصہ اَدا کرنا چاہئے‘‘۔
ایل جی نے کہا کہ جموں و کشمیر کے تاریک دور نے ہمارے نوجوانوں کے مستقبل کو تباہ کیا ہے۔انہوں نے کہا’’ آج ہمارے نوجوان اپنی اُمنگوں کو پورا کرنے کیلئے نئے عزم کے ساتھ آگے بڑھ رہے ہیں‘‘۔ اُنہوںنے کہا کہ اب وقت آگیا ہے کہ سکاؤٹس اینڈ گائیڈز نئے اہداف حاصل کریں اور سماجی ترقی میں سرگرمی سے حصہ لیں اور سماجی مساوات کے مقصد کے لئے کام کریں۔
سنہا نے کہاکہ مضبوط معیشت قوم کو مضبوط بناتی ہے۔ ہندوستان پانچویں سب سے بڑی معیشت کے طور پر ابھرا ہے اورہمارے نوجوانوں کا اگلے چار برسوں میں تیسری سب سے بڑی معیشت کے ہدف کو حاصل کرنے میں اہم رول ہے۔
لیفٹیننٹ گورنر نے اسکاؤٹس اور گائیڈس سے کہا کہ وہ اعتماد کے ساتھ آگے بڑھیں اور پانچ اہداف پر کام کریں جن میں قدیم اَقدار کو فروغ دینے کے لئے مل کر کام کرنا ، وِکست بھارت کے سفر میں حصہ اَداکرنا، ملک کے اتحاد اور سالمیت کے لئے مل کر آگے بڑھنا ، نوجوانوں کو جدید ٹیکنالوجی کی صلاحیتوں اور چیلنجوں کے بارے میں تعلیم دینا ، ماحولیاتی تحفظ کے لئے بیداری مہم شروع کرنا شامل ہیں۔
سنہانے صدر ایوارڈ کیلئے منتخب ہونے والے سکاؤٹس کومُبارک باد دی اور جموںوکشمیر یوٹی میں بھارت سکاؤٹس اینڈ گائیڈز تحریک کو مزید مضبوط بنانے کیلئے اِنتظامیہ کی طرف سے ہر ممکن تعاون کا یقین دِلایا۔
ایل جی نے جنوبی کوریا میں حال ہی میں منعقدہ۲۵ویں ورلڈ سکاؤٹس جمبوری میں ہندوستان کی نمائندگی کرنے والے اسکاؤٹس سے بھی بات چیت کی اور ان کے مستقبل کی کوششوں کے لئے نیک خواہشات کا اِظہار کیا۔
سنہا نے کہا کہ زائد اَز۶۳لاکھ سکاؤٹس اینڈ گائیڈز ہمارے ملک کے کثرت میں وحدت کی متاثر کن مثال ہیں اور گذشتہ سات دہائیوں میں اُنہوں نے نوجوانوں کے درمیان دوستی کے بندھن کو مضبوط کیا ہے۔
ایل جی نے کہا کہ جموں و کشمیر بھارت سکاؤٹس اینڈ گائیڈز کی ٹیم بے لوث طریقے سے معاشرے کی خدمت کر رہی ہے، صلاحیت سازی میں حصہ اَدا کر رہی ہے اور نوجوانوں میں نظم و ضبط اور قوم کے تئیں لگن جیسی اَقدار کو فروغ دے رہی ہے اور امدادی کارروائیوں کے دوران مثالی ہمت کا مظاہرہ کیا ہے۔
یاد رہے کہ ہربرس ۷ نومبر کو بھارت سکاؤٹس اینڈ گائیڈز کے یوم تاسیس کے طور پر منایا جاتا ہے اور پورے مہینے میں مختلف تقریبات منائی جاتی ہیں۔