چلئے صاحب کچھ نیا توسننے کو مل گیا…صرف سننے کیلئے ہی سہی لیکن کچھ تو نیا سنا… آپ نے بھی اور ہم نے بھی سنا کہ… کہ بی جے پی کے ترون چگ کاکہنا ہے کہ جموں کشمیر میں اسمبلی انتخابات ’بہت جلد‘ ہوں گے… اگرچہ چگ صاحب نے اس میں بھی اگر اور مگر سے کام لیا ہے… لیکن… لیکن اس کے باوجو دبھی انہوں نے’مناسب وقت پر‘ کا رٹا نہیں لگایا اور… اور پہلی بار ’جلد‘ اسمبلی انتخابات ہونے کی نوید سنائی ۔ چگ صاحب ! ہم آپ کے مشکور ہیں‘ شگر گزار بھی کہ آپ نے کچھ نیاتو کہا… وہ کیا ہے کہ ہمارے کان پک گئے تھے… تین چار برسوں سے پک گئے تھے… اس لئے پک گئے تھے کہ … کہ ۲۰۱۹ سے اب تک جس نے بھی جموں کشمیر میں اسمبلی انتخابات کی بات کی تو… تو ’مناسب وقت پر‘ کی ہی بات کی… اپنے امیت بھائی شاہ نے بھی کی… شریمان منوج سنہا صاحب نے بھی کی اور… تو اور الیکشن کمیشن آف انڈیا نے بھی’ ؔمناسب وقت پر‘ ہی کی رٹ لگائی… ایسے میں چگ صاحب کا بیان… ’جلد‘ اسمبلی انتخابات کا بیان ہوا کا ایک تازہ جھونکا سا محسوس ہوا… اس کے بعد بھی محسوس ہوا کہ… کہ ان شریمان کا یہ بیان … بیان تک ہی محدود ہے… اس سے زیادہ کچھ نہیں … لیکن صاحب ہمارے لئے اتنا ہی کافی ہے اور… اور سو فیصد ہے ۔چگ صاحب کے اس بیان کے بعد ہم اب مزید دو تین سال انتظار کر سکتے ہیں… دو تین سال الیکشن کے بغیر‘ اسمبلی کے بغیر ‘ عوامی حکومت کے بغیر‘ جمہوری طور منتخب حکومت کے بغیر نکل سکتے ہیں اور… اور آرام سے نکل سکتے ہیں…ہمیں نہیں لگتا ہے کہ اب کسی سیاسی جماعت … خاص کر نیشنل کانفرنس کے گورے گورے بانکے چھورے کو کسی بے تابی کا مظاہرہ کرتے ہوئے اسمبلی انتخابا ت کی مانگ کرنی چاہئے … اس کا مطالبہ کرنا چاہئے … انہیں چاہئے کہ اب انتظار کریں اور… اور ہمیں یقین ہے کہ ایسا ہی ہو گااور… اور اس لئے ہوگا کیوں کہ اپنے ترون چگ صاحب نے کہا ہے کہ جموں کشمیر میں’ جلد‘ انتخابات… اسمبلی انتخابات ہو ں گے … چک صاحب شکریہ… بہت بہت شکریہ کہ… کہ آپ نے کچھ الگ… کچھ نیا تو کہا…آپ نے ہمیں کچھ نیا تو سنایا کہ اللہ میاں کی قسم سچ میں ہمارے کان پک گئے تھے…’ؔمناسب وقت پر‘ سن سن کر پک گئے تھے۔ ہے نا؟