راجوری میں بارودی سرنگ کا دھماکہ، فوجی زخمی

جموں//
جموںکشمیر پولیس نے واضح کیا ہے کہ ضلع راجوری میں بدھ کے روز ڈرون گرانے کا کوئی واقعہ پیش نہیں آیا ہے ۔
پولیس نے کہا کہ جو تصویریں شیئر کی جا رہی ہیں وہ کسی پرانے واقعے کی ہیں۔ان کا کہنا تھا کہ اس خبر کو ضلع راجوری سے جوڑنے والے افواہ بازوں کے ساتھ سختی سے نمٹا جائے گا۔
جموںکشمیر پولیس راجوری نے’ایکس‘پر پوسٹ میں کہا’’سوشل میڈیا پر ضلع راجوری میں ڈورن گرانے کی خبریں/تصاویر شیئر کی جا رہی ہیں‘‘۔
پوسٹ میں کہا گیا’’یہ واضح کیا جاتا ہے کہ ضلع میں آج ایسا کوئی واقعہ جیسا کہ نیوز/تصاویر میں دکھایا جا رہا ہے ، پیش نہیں آیا اور اس نیوز کا ضلع راجوری سے کوئی تعلق نہیں ہے ‘‘۔
پوسٹ میں مزید کہا گیا کہ جو تصویریں شیئر کی جا رہی ہیں وہ کسی پرانے واقعے کی ہیں۔انہوں نے کہا کہ ضلع راجوری کے ساتھ ایسی نیوز جوڑنے والے افواہ بازوں کے ساتھ سختی سے نمٹا جائے گا۔
اس دوران راجوری ضلع میں ایل او سی کے نزدیک بارودی سرنگ کے ایک دھماکہ میں ایک اہلکار زخمی ہوا ہے ۔
دفاعی ذرائع نے بتایا کہ بدھ کے روز فورسز اہلکار معمول کے مطابق ایل او سی کے نزدیک گشت پر مامور تھے کہ اسی اثنا میں بارودی سرنگ کا ایک دھماکہ ہوا جس کے نتیجے میں نائیک دھیرج کمار شدید طورپر زخمی ہوا۔
ذرائع نے بتایا کہ زخمی اہلکار کو طبی امداد کی خاطر فوجی ہسپتال منتقل کیا گیا جہاں پر اس کی حالت مستحکم بتائی جارہی ہے ۔