’فورسز جموں صوبے میں پاکستان کے حمایت یافتہ دہشت گرد گروپوں کو کوئی موقع نہ دیں‘

جموں//
پولیس کے ڈائریکٹر جنرل (ڈی جی پی) دلباغ سنگھ نے جمعرات کو کہا کہ جموں کشمیر پولیس، دیگر سیکورٹی فورسز کے ساتھ، پوری طرح سے چوکس ہے اوریو ٹی میں دہشت گردی کو ختم کرنے کے لئے مل کر کام کر رہی ہے۔
ڈی جی پی پولیس اہلکاروں کے ساتھ بات چیت کر رہے تھے جو بدھ کے انکاؤنٹر کا حصہ تھے جس میں جموں زون کے ریاسی ضلع کے چسانہ میں ایک پاکستانی دہشت گرد کو مار گرایا گیا تھا۔
ایک بیان میں کہا گیا ہے’’چسانہ میں جوانوں اور افسران کے ساتھ بات چیت کرتے ہوئے، ڈی جی پی نے ایس ایچ او چسانہ اور انچارج پولیس چوکی ٹولی اور ان کی ٹیموں کے علاقے میں دہشت گرد کا سراغ لگانے کیلئے تیز رفتار اقدام اور چوکسی کی تعریف کی‘‘۔
سنگھ نے کہا کہ جموں و کشمیر پولیس جیسی پیشہ ورانہ فورس سے ہر سطح پر اس قسم کی کارروائی کی توقع کی جا رہی ہے اور دہشت گردوں کی نقل و حرکت سے متعلق معلومات پر ردعمل فوری اور موثر تھا۔
اس طرح کی تیز کارروائی کیلئے، ڈی جی پی نے پولیس پارٹی کو انعامات پیش کیے جو انکاؤنٹر کا حصہ تھی۔
بیان میں مزید کہا گیا ’’ ڈی جی پی نے اہلکاروں سے کہا کہ اسی طرح سے کام کریں اور علاقے میں پاکستان کے حمایت یافتہ دہشت گرد گروپوں کو کوئی موقع نہ دیں۔‘‘
سنگھ نے کہا کہ جموں و کشمیر پولیس لوگوں کو پرامن ماحول فراہم کرنے کیلئے دن رات کام کر رہی ہے اور ’’ مجموعی طور پر جموں و کشمیر کے تمام حصوں میں امن فروغ پا رہا ہے‘‘۔
ڈی جی پی نے بیان کے مطابق کہا’’ہمیں ایک مشن موڈ میں اپنی کوششیں جاری رکھنی ہوں گی تاکہ دہشت گردی سے پاک جموں و کشمیر کو محسوس کیا جا سکے‘‘۔
بیان کے مطابق سنگھ نے مزید کہا کہ مقامی لوگوں کی حمایت سے، سیکورٹی فورسز نے جموں خطہ میں پیر پنچال کے پونچھ،راجوری پٹی میں لائن آف کنٹرول کے ساتھ دراندازی کی کئی کوششوں کو ناکام بنایا۔ اس کے علاوہ اسلحہ، دھماکہ خیز مواد اور منشیات کی بڑی کھیپ ضبط کی۔
ڈی جی پی نے کہا کہ جموں و کشمیر پولیس دیگر سیکورٹی فورسز کے ساتھ پوری طرح چوکس ہے اور جموں و کشمیر میں دہشت گردی کو ختم کرنے کیلئے مل کر کام کر رہی ہے۔ انہوں نے کہا کہ پاکستان کی طرف سے دہشت گردوں کو دھکیلنے اور اسلحے اور منشیات کی سمگلنگ کی کسی بھی کوشش کو ناکام بنانے کے لیے بارڈر سکیورٹی گرڈ پہلے سے کہیں زیادہ مضبوط ہے۔