سونیا گاندھی بھی وارد کشمیر ‘ نگین جھیل میں کشتی کی سواری کا لطف بھی اٹھایا

سرینگر//
انڈین نیشنل کانگریس کے سینئر لیڈر اور رکن پارلیمان ‘راہل گاندھی اس وقت اپنے ذاتی دو روزہ دورے پر جموں و کشمیر کی گرمائی دارالحکومت سرینگر میں ہیں۔ وہیں آج اْن کی والدہ سونیا گاندھی بھی سرینگر پہنچ چکی ہیں اور اس وقت اپنے بیٹے کے ساتھ ہیں۔
کانگریس کی جموں و کشمیر انچارج رجنی پاٹل نے صحافیوں سے بات کرتے ہوئے کہا ’’راہل گاندھی لداخ کا اپنا دورہ مکمل کرنے کے بعد سرینگر آئے ہیں۔ وہ یہاں دو دن روکے گے اور سب کو پیار دیکر واپس لوٹ جائیں گے‘‘۔
پاٹل کا مزید کہنا تھا ’’آج دوپہر اْن کی والدہ سونیا جی بھی یہاں آئی ہے۔ پرینکا جی نہیں آرہی ہیں۔ یہ اْن کا ذاتی دورہ ہے، کوئی سیاسی دورہ نہیں ہے‘‘۔
پارٹی کے ذرائع کے مطابق، راہل گاندھی گزشتہ روز سرینگر آئے اور پھر نگین جھیل میں ایک ہاؤس بوٹ (دی جیول ان کراؤن) میں ٹھہریں۔ اْن کی موٹر سائیکل اس وقت کانگریس بھوان میں کھڑی ہے۔اْن کا مزید کہنا تھا ’’سونیا جی کا ایئرپورٹ پر پارٹی کے سینئر لیڈران نے استقبال کیا، اس کے بعد وہ ہاؤس بوٹ پر گئیں، اور پھر کچھ دیر تک نگین جھیل میں کشتی کی سواری کا لطف بھی اٹھایا‘‘۔
ہاؤس بوٹ کے مالک آصف وانگنو کا کہنا تھا ’’راہل گاندھی نے گزشتہ روز ہمارے ہاؤس بوٹ میں چیک ان کیا تھا۔ وہ یہاں بچوں سے بھی ملے۔ تاہم آج شام ساڈھے پر انہوں نے چیک آؤٹ کرکے دارالسلام ہوٹل میں چلے گئے۔ اْن کی والدہ بھی اْن کے ہمراہ تھیں‘‘۔
وانگنو کا مزید کہنا تھا ’’ہماری ہاؤس بوٹ کا نام ایک برطانوی فلم پر رکھا گیا ہے اور راہل جی نے ہماری بوٹ کے موڈیفائڈ وریڑن کا افتتاح بھی کیا‘‘۔
واضح رہے کہ گزشتہ روز کانگریس کے سینئر رہنما راہل گاندھی لداخ دورے سے واپسی کے بعد جمعے کی سہ پہر سونہ مرگ پہنچے‘ جہاں پر پہلے سے موجود کانگریس لیڈروں اور کارکنان نے ان کا پرتپاک استقبال کیا۔
گزشتہ روز راہل گاندھی نے کرگل میں ایک عوامی اجتماع سے خطاب کرتے ہوئے کہا ’’لداخ ایک اسٹریٹجک جگہ ہے، ایک بات تو واضح ہے کہ چین نے ہندوستان کی زمین چھین لی ہے۔ یہ افسوسناک ہے کہ اپوزیشن کی میٹنگ میں پی ایم مودی نے کہا کہ لداخ کا ایک انچ بھی چین نے نہیں لیا‘ جو کہ جھوٹ ہے‘‘۔