نئی دہلی// بھارتیہ جنتا پارٹی (بی جے پی) کی رہنما اور وزیر خزانہ نرملا سیتا رمن نے جمعرات کو لوک سبھا میں کہا کہ ڈی ایم کے اراکین کو خواتین کے خلاف مظالم پر بولنے سے پہلے سابق وزیر اعلی آنجہانی جے للیتا کا واقعہ یاد رکھنا چاہیے ۔
محترمہ سیتا رمن نے تحریک عدم اعتماد پر بحث میں حصہ لیتے ہوئے کہا کہ ڈی ایم کے کے رکن نے منی پور میں خواتین پر ہونے والے مظالم کا دروپدی چیرہرن سے موازنہ کیا، اس لیے وہ انہیں یاد دلانا چاہیں گی کہ 1989 میں تمل ناڈو اسمبلی میں محترمہ جے للیتا کی ساڑی کھینچی گئی تھی۔ اس وقت ڈی ایم کے ممبران ان کا مذاق اڑا رہے تھے ۔ انہوں نے کہا کہ منی پور پر بات کرتے ہوئے ڈی ایم کے ممبران محترمہ جے للیتا کے ساتھ کیا گیا واقعہ بھول جاتے ہیں۔
محترمہ سیتارمن نے کہا کہ اس واقعہ کے بعد محترمہ جے للیتا نے قسم کھائی تھی کہ جب تک وہ وزیر اعلیٰ نہیں بن جاتیں وہ ایوان میں داخل نہیں ہوں گی۔ وہ اپنی قسم پوری کر کے وزیر اعلیٰ بننے کے بعد ہی ایوان میں آئیں۔
محترمہ سیتا رمن نے کہا کہ ان کا ماننا ہے کہ کسی بھی خاتون کے ساتھ بدتمیزی نہیں ہونی چاہئے لیکن ڈی ایم کے اراکین کو اپنی پارٹی کے دور میں پیش آنے والے واقعات کا نوٹس لیتے ہوئے کوئی بیان نہیں دینا چاہئے ۔