منشیات کی آسان دستیابی کی روک تھام تک استعمال کا خاتمہ ناممکن:عمر

سرینگر///
سابق وزیر اعلیٰ اور نیشنل کانفرنس کے نائب صدر ‘ عمرعبداللہ نے کہا ہے کہ منشیات کی آسان دستیابی کی روک تھام تک استعمال کا خاتمہ ناممکن
عمرعبداللہ آج منشیات کے خلاف نیشنل کانفرنس کی جنگ کمیٹی کے ایک غیر معمولی اجلاس کی صدارت کررہے تھے ۔
اجلاس میں ورلڈ ہیلتھ آرگنائزیشن کے نمائندے نے معاشرے میں اس مسئلے سے متعلق ایک پاور پوائنٹ پریزنٹیشن پیش کی۔ جبکہ ٹیم ریڈ نامی این جی او کے نمائندے بھی اجلاس میں شریک ہوئے اور منشیات مخالف جنگ میں نیشنل کانفرنس کی کوششوں میں تعاون دینے کی پیشکش کی۔
اجلاس سے خطاب کرتے ہوئے عمر عبداللہ نے کہا کہ منشیات کی آسان دستیابی انتہائی تشویشناک امر ہے اور جب تک اس پر بریک نہیں لگائی جائے گی اس وقت تک نوجوانوں کو منشیات سے دور رکھنا ناممکن ہے ۔
سابق وزیر اعلیٰ کا کہنا تھا کہ منشیات کااستعمال کسی ایک صنف تک محدود نہیں ہے اور خطرناک حد سے مرد و زن میں سرائیت کر گیاہے ۔
عمرعبداللہ نے کہا کہ نوجوان پود میں منشیات اور دیگر نشہ آور ادویات کے استعمال کا رجحان خطرناک حد تک بڑھ چکا ہے مگر حکومتی سطح پر روک تھام کے اقدامات محض کاغذی گھوڑوں اور ذرائع ابلاغ تک ہی محدود ہے ۔
این سی نائب صدر نے کہا کہ منشیات کے استعمال سے دیگر جرائم کے گراف میں بھی زبردست اضافے دیکھنے کو مل رہا ہے اور منشیات کے عادی افراد ہاتھوں قتل ، چوری اور ڈاکہ زنی کے معاملات ہونا اب معمول بن کر رہ گیا ہے ۔
عمرعبداللہ نے کہا کہ نیشنل کانفرنس ہر اُس کوشش میں مکمل اشتراک اور تعاون دینے کیلئے تیار ہے جس کا مقصد ہر قسم کے منشیات کا قلع قمع کرناہو۔
اس سے قبل کمیٹی کے چیئرمین عبدالرحیم راتھر نے اب تک کی کارروائی کے بارے میں اجلاس کو آگاہ کیا اور حال ہی میں تشکیل شدہ گروپوں کی طرف پیش کی گئی رپورٹوں پر بھی تبادلہ خیالات کیا گیا۔ انہوں نے کہا کہ پارٹی کی تمام اکائیوں سے منشیات کیخلاف جنگ کیلئے تعاون طلب کیا جارہاہے ۔