سرینگر///
شمالی ضلع بانڈی پورہ میں سیکورٹی فورسز نے لشکر طیبہ سے وابستہ ملی ٹینٹ معاون کو دھر دبوچ کر اس کے قبضے سے دو گرینیڈ برآمد کرکے ضبط کئے ۔
پولیس کے ایک ترجمان نے بتایا کہ۲۶؍آسام رائفلز‘۳بٹالین سی آر پی ایف‘بی ایس ایف اور جموں وکشمیر پولیس نے ایک مشترکہ آپریشن کے دوران ترکپورہ بانڈی پورہ میں ملی ٹینٹ معاون کو حراست میں لیا۔
پولیس نے ملی ٹینٹ معاون کی شناخت جاوید احمد ملہ ساکن ارن درد پورہ کے بطور کی ہے ۔
پولیس ترجمان کے مطابق جاوید احمد کے قبضے سے دوگرینیڈ بھی برآمد کئے گئے ۔
پولیس نے اس سلسلے میں کیس درج کرکے مزید تحقیقات شروع کی۔
ادھرجنوبی ضلع اننت ناگ کے وبزن گاوں میں ملی ٹینٹ مخالف آپریشن کے دوران سیکورٹی فورسز نے جنگجو معاون کو اسلحہ سمیت دھر دبوچ کر سلاخوں کے پیچھے دھکیل دیا۔
پولیس ذرائع نے بتایا کہ۳آر آر اور جموں وکشمیر پولیس نے مصدقہ اطلاع موصول ہونے کے بعد وبزن گاوں کو محاصرے میں لے کر تلاشی آپریشن شروع کیا۔
ذرائع نے بتایا کہ آپریشن کے دوران سیکورٹی فورسز نے ملی ٹینٹ معاون جس کی شناخت لیاقت احمد گانی ولد لطیف احمد گانی کے بطور ہوئی کی گرفتاری عمل میں لائی۔
ان کے مطابق گرفتار ملی ٹینٹ معاون کے قبضے سے ایک پستول ، دو پستول میگزین‘۱۴راؤنڈ اوردوسرا قابل اعتراض مواد برآمد کرکے ضبط کیا گیا۔
پولیس نے اس سلسلے میں کیس درج کرکے مزید تحقیقات شروع کی۔
دریں اثنا پولیس نے دعویٰ کیا ہے کہ اس نے کولگام میں نوجوانوں کو جنگجوؤں کی صفوں میں شامل کرنے کے ایک گروہ کا پردہ فاش کرتے ہوئے ایک پی ایچ ڈی اسکالر سمیت تین کو گرفتار کر لیا ہے ۔