نڈا نے گھپلوں پر کارروائی سے بچنے کے لیے یو پی اے کو بھان متی کا کنبہ قرار دیا

نئی دہلی// بھارتیہ جنتا پارٹی (بی جے پی) کے صدر جگت پرکاش نڈا نے کانگریس کی قیادت والے متحدہ ترقی پسند اتحاد (یو پی اے ) کو سیاسی خود غرضی کی کھوکھلی بنیاد پر بنایا گیا ‘بھان متی کا کنبہ’ قرار دیتے ہوئے آج کہا کہ 20 لاکھ کروڑ روپے کے گھپلوں پر کارروائی سے بچنے کے لیے یہ اتحاد بنایا گیا ہے جس کا نہ کوئی لیڈر ہے ، نہ نیت، نہ پالیسی اور نہ فیصلہ سازی کی طاقت۔
منگل کو نیشنل ڈیموکریٹک الائنس (این ڈی اے ) کی میٹنگ کے موقع پر پارٹی کے مرکزی دفتر میں ایک پریس کانفرنس سے خطاب کرتے ہوئے مسٹر نڈا نے آج کہا کہ ملک کی 38 سیاسی جماعتوں نے این ڈی اے کی میٹنگ میں اب تک اپنی شرکت کی تصدیق کی ہے اور اس تعداد میں اضافہ ہو سکتا ہے ۔
انہوں نے کہا کہ گزشتہ نو سالوں میں این ڈی اے کا گراف اور دائرہ کار بڑھا ہے اور سیاسی پارٹیوں کی ترقی کے ایجنڈے پر عمل کرنے کی خواہش میں اضافہ ہوا ہے اور اس کے نتیجے میں این ڈی اے کا دائرہ بہت بڑھ گیا ہے ۔
مسٹر نڈا نے این ڈی اے کو ملک کی خدمت کے لیے وقف اتحاد قرار دیا اور کہاکہ ‘‘قومی جمہوری اتحاد 25 سال مکمل کر رہا ہے ۔ این ڈی اے سابق وزیر اعظم اٹل بہاری واجپائی کی پوری میعاد اور مسٹر مودی کی دو میعاد کے بعد بھی مضبوط ہے ۔ انہوں نے کہا کہ کل شام کو قومی جمہوری اتحاد کا اجلاس بلایا گیا ہے ۔ پچھلے 9 سالوں میں این ڈی اے کی تمام پارٹیوں نے این ڈی اے کے ترقیاتی ایجنڈے ، منصوبوں، پالیسیوں میں دلچسپی ظاہر کی ہے ، جو وزیر اعظم نریندر مودی کی قیادت میں چل رہے ہیں۔ پچھلے نو سالوں میں ہم نے وزیر اعظم مودی کی مضبوط قیادت دیکھی ہے ۔ ملک نے اسے سراہا ہے اور ایک مثبت ماحول پیدا ہوا ہے ۔ ملک کا عام شہری بھی فخر محسوس کرتا ہے ۔
کانگریس اور اس کے اتحادیوں پر طنز کرتے ہوئے بی جے پی صدر نے کہاکہ "کہیں کی اینٹ، کہیں کاروڑا۔ بھان متی نے ایک کنبہ جوڑا…. جہاں تک یو پی اے کا تعلق ہے ، یہ بھان متی کا کنبہ ہے ۔ یہ ایسا اتحاد ہے ، جس کا نہ کوئی لیڈر ہے ، نہ نیت، نہ پالیسی، نہ فیصلے لینے کی طاقت۔ یہ یو پی اے حکومت کے 10 سال کی بدعنوانی اور گھپلوں کا مجموعہ ہے ۔ انہوں نے کہا کہ سیاسی خود غرضی کے اس سیاسی اتحاد کی بنیاد کھوکھلی ہے ۔ کانگریس نے یہ اتحاد بیس لاکھ کروڑ روپے کے گھپلوں اور بدعنوانی پر کارروائی سے بچنے کے لیے تیار کیا ہے ۔