داماد کی ٹیسٹ میں 100 وکٹیں مکمل ہونے پر شاہد آفریدی کی نیک خواہشات کا اظہار

لاہور// سابق کپتان شاہد آفریدی نے داماد اور فاسٹ بولر شاہین آفریدی کی ٹیسٹ کیرئیر میں 100 وکٹیں مکمل ہونے پر ان کے لیے نیک خواہشات کا اظہار کیا ہے۔
ٹوئٹر پر شاہین کی وکٹ لینے کے بعد جشن مناتے ایک تصویر شیئر کرتے ہوئے شاہد آفریدی نے لکھا کہ 100 وکٹیں مکمل ہوگئیں لیکن مزید اور لینی ہیں۔اپنی ٹوئٹ میں شاہد آفریدی نے داماد شاہین و مبارکباد دیتے ہوئے لکھا کہ اس محنت کو جاری رکھنا ہے۔
شاہد آفریدی نے اپنی ٹوئٹ میں شاہین کے لیے مزید ریکارڈ اور کامیاب ہونے کے لیے دعا بھی کی۔
شاہین آفریدی نے اتوار کو سری لنکا کے خلاف کھیلے جارہے پہلے ٹیسٹ میچ کے پہلے دن ٹیسٹ کرکٹ میں 100 وکٹیں مکمل کی تھیں، قومی کرکٹر نے سری لنکا کے نشان مدوشکا کو آؤٹ کرکے 100 ویں وکٹ حاصل کی۔
شاہین آفریدی 100 ٹیسٹ وکٹیں مکمل کرنے والے 19 ویں پاکستانی کھلاڑی ہیں،فاسٹ بولر نے اپنے 26 ویں ٹیسٹ میچ میں 100 ٹیسٹ وکٹوں کا سنگ میل عبور کیا۔