سرینگر جتنا خوبصورت اب ہے ماضی میں اس کی نظیر نہیں مل سکتی

سرینگر//
جموںکشمیر کے چیف سیکریٹری ‘ڈاکٹر ارون کمار مہتا نے ہفتہ کے روز بتایا کہ سرینگر آج جتنا حسین و جمیل دکھائی دے رہا ہے ماضی میں اس کی نظیر ملنا مشکل ہے۔
مہتانے کہا کہ جی ٹونٹی کے حوالے سے سبھی تیاریاں مکمل کی گئی ہیں۔چیف سیکریٹری نے واضح کیا کہ جی ٹونٹی اجلاس کے حوالے سے جن مقامات کی نشاندہی کی گئی انہیں تبدیل نہیں کیا گیا ہے۔
ان باتوں کا اظہار موصوف نے سری نگر میں نامہ نگاروں سے بات چیت کے دوران کیا۔
چیف سیکریٹری نے کہاکہ سرینگر کی خوبصورتی سب کے سامنے عیاں ہے اور میں یہ دعوئے کے ساتھ کہہ سکتا ہوں کہ ایسا کھبی دیکھنے کو نہیں ملا تھا۔ان کے مطابق اس سے یہاں کے سیاحتی شعبے کو فروغ ملے گا۔
ڈاکٹرمہتا نے اعدادوشمار ظاہر کرتے ہوئے بتایا کہ سال۲۰۱۸۔۲۰۱۹میں نو ہزار پروجیکٹ مکمل کئے گئے جبکہ اس کے بعد ۹۲ہزار پروجیکٹ پایہ تکمیل تک پہنچے ہیں جو اس بات کا ثبوت ہے کہ انتظامیہ کی جانب سے بڑے پیمانے پر تعمیر وترقی کے کام شروع کئے گئے ہیں۔
جی ٹونٹی اجلاس کے بعد بھی تعمیر وترقی کے کام جاری رکھنے کے بارے میں چیف سیکریٹری نے کہاکہ کام ہر صورت میں جاری رہیں گے۔
ایک اور سوال کے جواب میں چیف سیکریٹری نے کہاکہ پائین شہر میں بھی تعمیر وترقی کے کام شروع کئے گئے ہیں اور ہیرٹیج مقامات کو بھی ترقی سے ہمکنار کیا جارہا ہے۔
جی ٹونٹی مقامات کو تبدیل کرنے کے بارے میں جب چیف سیکریٹری سے سوال کیا گیا تو انہوں نے واضح کیا کہ مخصوص کردہ مقامات کو تبدیل نہیں کیا گیا ہے۔