سرینگر//
ڈیموکریٹک پراگریسیو آزاد پارٹی(ڈی پی اے پی) کے چیئرمین غلام نبی آزاد نے پارٹی کے جنرل سیکریٹری عبدالرشید ڈار کو بنیادی رکنیت سے بے دخل کیا ہے۔
ڈی پی اے پی کے جنرل سیکریٹری آر ایس چب نے ایک حکمنامہ جاری کرتے ہوئے لکھا کہ غلام نبی آزاد چیئرمین ڈیموکریٹک پراگریسیو آزاد پارٹی نے حاجی عبدالرشید ڈار کو پارٹی کی بنیادی رکنیت سے بے دخل کیا ہے۔
چب کا کہنا ہے کہ عبدالرشید ڈار کو پارٹی مخالف سرگرمیوں کے پیش نظر پارٹی سے نکال دیا گیا ہے۔
قابل ذکر ہے کہ عبدالرشید ڈار کانگرس کے دیرینہ رکن تھے اور دو مرتبہ بارہمولہ ضلع کے سوپور اسمبلی حلقے سے رکن اسمبلی رہ چکے ہیں۔ انہوں سنہ۲۰۰۸؍اور ۲۰۱۴ میں نیشنل کانفرنس کے امیدوار کے خلاف انتخابات جیتے تھے۔
عبدالرشید ڈار نے گذشتہ برس آزاد کی نئی پارٹی ڈی پی اے پی میں شمولیت اختیار کی تھی اور ان کو پارٹی کا جنرل سیکرٹری بنایا گیا تھا۔
غلام نبی آزاد بتایا جاتا ہے کہ عبدالرشید ڈار الطاف بخاری کی اپنی پارٹی میں شامل ہونے جارہے ہیں۔
غور طلب ہے کہ گذشتہ روز ان کے بھتیجے محبوب مصطفی بٹ نے آزاد کی سیاسی جماعت کو الوداع کہا۔ اس کے علاوہ گزشتہ روز ہی ۱۳؍ارکان نے آزاد کی پارٹی سے استعفی دیا تھا۔
واضح رہے کہ آزاد نے گذشتہ برس اگست میں چالیس برسوں کے بعد کانگرس کی بنیادی رکنیت سے استعفی دیا تھا اور ڈیموکریٹک پراگریسیو آزاد پارٹی کی بنیاد ڈالی۔ آزاد کے سیاسی حریفوں بالخصوص کانگرس رہنماؤں نے ان ہر الزام عائد کیا کہ انہوں حکمران جماعت بی جے پی کی ہدایت پر کانگرس سے استعفیٰ دیا اور پارٹی بنائی تاکہ جموں کشمیر میں مسلم ووٹ کو انتخابات میں تقسیم کیا جائے جس سے بی جے پی کو انتخابات میں فائدہ ہو۔