کراچی//
پاکستان کرکٹ ٹیم کے وکٹ کیپر بیٹر محمد رضوان نے ون ڈے کرکٹ میں چوتھے نمبر پر بیٹنگ کرنے کی خواہش کا اظہار کردیا۔
واضح رہے کہ بیٹنگ آرڈر کے مطابق کپتان بابر اعظم تیسرے نمبر پر بیٹنگ کےلیے آتے ہیں، جبکہ محمد رضوان اکثر پانچویں یا چھٹے نمبر پر بیٹنگ کرتے ہیں۔
تاہم کراچی میں پریس کانفرنس کرتے ہوئے محمد رضوان نے کہا کہ میں چاہتا ہوں ون ڈے میں چوتھے نمبر پر کھیلوں، پانچویں نمبر سے خوش نہیں۔
ان کا کہنا تھا کہ مجھے ماضی میں ون ڈے میں اوپننگ کا بھی کہا گیا تھا، میں ہر نمبر پر کھیلنے کیلئے تیار ہوں۔
محمد رضوان نے کہا کہ ہر میچ ہمارے لیے نیا اور اہم ہوتا ہے، پچھلا میچ بھول کر نئے میچ کیلئے میدان میں اترتے ہیں، ہمارا فوکس اس سیریز کو جیتنے پر ہے۔
وکٹ کیپر بیٹر نے کہا کہ امام الحق کی جگہ افتخار کو کھلائیں تو افتخار کا کھیل نہیں ہوگا، ہر کھلاڑی کی اپنی پوزیشن ہوتی ہے، اللّٰہ نے ہر انسان کی علیحدہ خوبی بنائی ہے، میں الگ، فخر الگ اور بابر الگ ہیں۔
ایک سوال کے جواب میں رضوان نے دلچسپ جواب دیتے ہوئے کہا کہ ہماری بیس کروڑ کی آبادی میں شاید 10 کروڑ تو کمنٹیٹر ہی ہوں گے۔
محمد رضوان نے کہا کہ آخری ٹی ٹوئنٹی میں ہم اپنے مقررہ ہدف تک آگئے تھے اس لیے عماد نے سنگل لیا، اگر ہم آخری ٹی ٹوئنٹی جیت جاتے تو آج ایسے سوال نہیں ہوتے۔
ساتھ میں انہوں نے یہ بھی اعتراف کیا کہ میں آخر میں رنز نہ کرسکا یہ میری غلطی ہے۔
خیال رہے کہ نیوزی لینڈ کیخلاف ٹی ٹوئنٹی سیریز کے آخری میچ میں پاکستان کی اننگز کے آخری لمحات میں 11 گیندوں پر 14 رنز بنائے تھے جس کی وجہ سے انہیں تنقید کا نشانہ بنایا گیا۔
میچ میں شکست کے بعد کپتان بابر اعظم نے 15 سے 20 رنز کم بنانے کا اعتراف کیا تھا۔