’جب کوئی عالمی وبا نہیں تھی، تب بھی صحت کی دیکھ بھال کیلئے ہندوستان کا نظریہ عالمگیر تھا‘

نئی دہلی///
وزیر اعظم نریندر مودی نے یونیورسل ہیلتھ کیئر سیکورٹی پر زور دیتے ہوئے بدھ کوکہا کہ ہندوستان کے روایتی صحت کی دیکھ بھال کے نظام تناؤ اور طرز زندگی کی بیماریوں کا حل پیش کرتے ہیں۔
مودی نے یہاں ’ون ارتھ ون ہیلتھ … ایڈوانٹیج ہیلتھ کیئر انڈیا۲۰۲۳‘کے چھٹے ایڈیشن کا افتتاح کرتے ہوئے کہا کہ جب کوئی عالمی وبا نہیں تھی، تب بھی صحت کی دیکھ بھال کیلئے ہندوستان کا نظریہ عالمگیر تھا۔ ہندوستان کا مقصد جسمانی، ذہنی اور سماجی بہبود ہے ۔
حقیقی ترقی عوام پر مرکوز ہے اور طبی سائنس میں چاہے کتنی ہی ترقی ہوجائے ، آخری فرد تک رسائی یقینی ہونی چاہیے ۔ ہندوستان کا مقصد نہ صرف اپنے شہریوں کیلئے بلکہ پوری دنیا کیلئے صحت کی دیکھ بھال قابل رسائی اور سستی بنانا ہے ۔ انہوں نے کہا کہ یوگا اور دھیان جدید دنیا کیلئے ہندوستان کا قدیم تحفہ ہیں، جو اب ایک عالمی تحریک بن چکے ہیں۔
وزیر اعظم نے ایک قدیم سنسکرت شلوک کا حوالہ دیتے ہوئے کہا ’’ہرکوئی خوش رہے ‘ہر کوئی بیماری سے پاک رہے ، سبھی کیلئے اچھی چیزیں ہوں، اور کوئی بھی دکھ میں مبتلا نہ ہو‘‘۔
مودی نے کہا کہ صحت کے بارے میں ہندوستان کا نقطہ نظر تب بھی عالمگیر تھا جب ہزاروں سال پہلے کوئی عالمی وبا نہیں تھی۔ ہمارا نقطہ نظر صرف انسانوں تک ہی محدود نہیں ہے ۔ یہ ہمارے پورے ماحولیاتی نظام تک پھیلا ہوا ہے ۔ پودوں سے لے کر جانوروں تک، مٹی سے لے کر ندیوں تک، جب ہمارے اردگرد ہر چیز صحت مند ہے ، تو ہم صحت مند رہ سکتے ہیں۔
وزیر اعظم نے اس بات پر زور دیا کہ صحت کے تئیں ہندوستان کا نقطہ نظر صرف بیماری کی کمی پرنہیں رکتا ہے ۔ یہ مقصد سب کی فلاح و بہبود پر مرکوز ہے ۔ انہوں نے کہا’’ہمارا مقصد جسمانی، ذہنی اور سماجی بہبود ہے ‘‘۔
مودی نے باجرے کا بھی ذکر کیا جو ہندوستان کی روایتی غذا کا حصہ ہیں اور دنیا بھر میں غذائی تحفظ اور غذائیت کے مسائل سے نمٹنے کی صلاحیت رکھتے ہیں۔
وزیر اعظم نے زور دے کر کہا کہ صحت سے متعلق چیلنجز کیلئے عالمی ردعمل کو الگ نہیں کیاجاسکتا ہے اور یہ ایک مربوط، جامع اور ادارہ جاتی ردعمل کا وقت ہے ۔ یہ جی۲۰کی صدارت کے دوران ہمارے فوکس ایریاز میں سے ایک ہے ۔ ہماراہدف نہ صرف اپنے شہریوں کیلئے بلکہ پوری دنیا کیلئے صحت کی دیکھ بھال کو قابل رسائی اور سستی بناناہے ۔