جموں و کشمیر وقف بورڈ نے اپنے اسکولوں کے لئے رہنما خطوط جاری کئے

سرینگر/۱۵اپریل
جموں و کشمیر وقف بورڈ نے قومی تعلیمی پالیسی 2020 کے تحت اصلاحی اقدامات کرنے کےلئے اپنے دائرہ اختیار میں آنے والے اسکولوں کےلئے رہنما خطوط جاری کئے ہیں۔
وقف بورڈ کا کہنا ہے کہ مذکورہ پالیسی کی رو سے دوسری جماعت کے طلبا کے لئے کوئی ہوم ورک نہیں ہوگا جبکہ نرسری اور یو کے جی جماعتوں کےلئے کوئی اسکول بیگ نہیں ہوگا۔
بورڈ نے روزانہ، ماہانہ اور سالانہ ٹائم ٹیبل اور اسکولوں کے ذریعہ کی جانے والی سرگرمیوں کے شیڈول کےلئے اسکولوں کے سربارہوں کے نام ہدایات جاری کی ہیں۔
بورڈ کی طرف سے جاری سرکیولر کے مطابق یومیہ ٹائم ٹیبل میں مضامین پڑھانے کے لئے تیس تیس منٹوں کے 6 پیریڈ (ٹائم سلاٹ) ہوں گے لازمی مضامین جیسے انگریزی، ریاضی، سائنس، سوشل سائنش اور اردو کے لئے پانچ پیریڈ اور چھٹے پیریڈ کو اختیاری مضامین جیسے کمپیوٹر، کشمیری، عربی، اسلامیات، صوفی سنتوں کا ادب پڑھانے کے لئے مخصوص رکھا جائے گا۔
سرکیولر میں کہا گیا”اسکولوں میں لازمی طور پر ہر روز ایک گھنٹہ غیر نصابی سرگرمیوں کے لئے مختص ہوگا جسے دن کے پہلے اور دوسرے نصف حصے میں30 منٹ کے دو حصوں میں تقسیم کیا جائے گا“۔
بورڈ سرکیولر میں کہا گیا کہ ہر اسکول میں انٹرا اسکول نصابی اور کھیلوں کے مقابلوں کے لئے ہاﺅس سسٹم قائم کیا جائے گا۔
سرکیولر میں کہا گیا”طلبا کے درمیان تعلق اور صحت مند مسابقت کا جذبہ پیدا کرنے کے لئے تمام اسکولوں کے سربراہوں کو ہدایت دی جاتی ہے کہ وہ طلبا کو مشہور صوفی بزرگوں حضرت شیخ نورالدین نورانی ؒ، حضرت شیخ عبدالقادر جیلانی ؒ، حضرت شیخ حمزہ مخدومؒ اور حضرت شاہ ہمدان ؒ ناموں پر چار ہوسز میں تقسیم کریں“۔
وقف بورڈ کے سرکیولر میں کہا گیا کہ کھیلوں کے سالانہ کلینڈر میں کھیلوں کی سرگرمیوں کے مقابلے شامل ہوں گے اور اسی طرح نصابی سرگرمیوں میں بھی سال بھر مقابلے منعقد ہونے چاہئے ۔
سرکیولر کے مطابق مہینے میں تین دن مکمل طور پر کھیلوں اور نصابی مقابلوں کے لئے مختص ہوں گے اور ان دنوں کے دوران کوئی نصابی سرگرمیاں نہیں ہوں گی۔
اسکول انتظامیہ کو چاہئے کہ وہ ہر مہینے کم سے کم تیس منٹوں کا ایک پیریڈ ہاﺅس میٹنگوں کے لئے مختص رکھیں تاکہ ہاﺅس کمیٹی ممبران ایک دوسرے کے ساتھ بات چیت کرکے اپنے اپنے ہاﺅس ماسٹرس کی رہنمائی کے تحت ہاﺅس سرگرمیوں کا منصوبہ تیار کر سکیں۔
سرکیولر میں کہا گیا کہ ماہ ستمبر اور اکتوبر میں انٹر اسکول مقابلے منعقد ہوں گے اور ان میں کامیابی حاصل کرنے والوں کو انعامات سے نوزا جائے گا۔
صبح کی اسمبلی، مختصر دعا کے بعد خبروں کی سرخیوں، طلبہ کے ایک گروپ کا مختصر ٹیلنٹ شو، حیرت انگیز حقائق، دن کی شخصیت جیسی دلچسپ چیزوں پر مشتمل ہوگی اور اس اسمبلی کے دوران اساتذہ کے لیکچرز سے گریز کیا جائے گا۔