جموں؍۲۲؍اکتوبر
ڈوڈہ ضلع کے بھگواہ علاقے میں بدھ کی دیر رات آگ لگنے سے چھ دکانیں اور دو اسٹور جل کر خاکستر ہوگئے، جس کے نتیجے میں مقامی دکانداروں کو بھاری مالی نقصان اٹھانا پڑا۔ حکام کے مطابق واقعے میں کسی جانی نقصان یا کسی کے زخمی ہونے کی اطلاع نہیں ہے۔
حکام نے بتایا کہ آتشزدگی کا واقعہ ڈیسہ۔بھگواہ علاقے میں پیش آیا۔ آگ پر قابو پانے کے لیے محکمہ فائر اینڈ ایمرجنسی سروسز کے اہلکاروں نے مقامی پولیس اور لوگوں کے ساتھ مل کر کارروائی کی۔
مقامی دکاندار عبدالرحمان نے بتایا کہ فائر بریگیڈ کے پہنچنے سے پہلے ہی آگ تیزی سے پھیل گئی تھی، جس کے باعث دکانوں میں موجود سامان کا بڑا حصہ تباہ ہوگیا۔
انہوں نے کہا کہ دکاندار اپنے گھروں میں تھے جب انہیں بازار میں آگ لگنے کی اطلاع ملی۔ جب وہ موقع پر پہنچے تو آگ پھیل چکی تھی اور فائر بریگیڈ کی آمد سے پہلے ہی کافی سامان جل کر تباہ ہوچکا تھا۔
ان کے مطابق متاثرہ دکانوں میں موبائل فون اور الیکٹرانک سامان فروخت کرنے والی دکانیں بھی شامل ہیں۔
حکام نے بتایا کہ آتشزدگی سے ہونے والے مجموعی مالی نقصان اور آگ لگنے کی وجوہات کا فوری طور پر تعین نہیں کیا جا سکا ہے۔
۔۔۔۔۔۔۔(ایجنسیاں )
