گل لالہ کا باغ آج سیاحوں کیلئے رسمی طور پر کھولا جا رہا ہے ‘۱۲ لاکھ ٹیولپ سیاحوں کے منتظر

سرینگر//
سرینگر کی زبرون پہاڑیوں کے دامن میں واقع ایشیا کا سب سے بڑا باغ گل لالہ زائد از۱۲لاکھ حسین و جمیل ٹولپ کے ساتھ سیاحوں کی آمد کیلئے ہر لحاظ سے تیار ہے ۔
بتادیں کہ متعلقہ حکام کے مطابق باغ گل لالہ کو ۱۹مارچ سے عوام کے لئے کھولا جائے گا۔
جھیل ڈل کے کناروں پر واقع اس وسیع و عریض اور دلکش باغ جس میں لاکھوں رنگ برنگی ٹلپ بلب لگے ہوئے ہیں،کو لیفٹیننٹ گورنر منوج سنہا کی طرف سے اتوار کی دو پہر کو عوام کیلئے کھولے جانے کی توقع ہے ۔
باغ گل لالہ میں امسال ہالینڈ سے بر آمد شدہ چار نئے ٹلپ کا اضافہ کیا گیا ہے جن میں کیپ کنیا، سویٹ ہارٹ، ہیملٹن اور کرسمس ڈریم شامل ہیں۔
ایک عہدیدار کا کہنا ہے کہ موسم بہار کی آمد پر ۶۸رنگ برنگی اقسام کے ٹیولپ بلب کے علاوہ ڈیفوڈل، ہائیسن، مسکری کے چشم کشا پھول اور بادام، خوبانی، آڑو کے درخت بھی باغ کی خوبصورتی و شان و شوکت میں چار چاند لگائیں گے ۔
عہدیدار نے کہا کہ باغ میں فی الوقت زائد از ایک درجن اقسام کے۲۵فیصد ٹولپ کھل گئے ہیں اور موسم ساز گار رہنے کی صورت میں باقی ٹولپ بھی کھلیں گے ۔
عہدیدار نے کہا’’گل لالہ کا پھول بہت ہی نازک ہونے کے ساتھ ساتھ اِس کی زندگی صرف ۱۵سے ۱۷دنوں پر ہی محیط ہوتی ہے ۔ تاہم ٹیولپ کی زندگی اس کے قسم اور موسمی صورتحال پر منحصر ہے ۔ اگر موسم سرد رہا تو اس کی زندگی بڑھ سکتی ہے ۔ اگر درجہ حرارت۲۰ڈگری سے اوپر چلا گیا تو اس کی زندگی کچھ دن مختصر ہوجاتی ہے ‘‘۔
اتوار کو باغ کی افتتاحی تقریب پر مہمانوں کی تفریح کیلئے موسیقی کے ایک پروگرام کا انعقاد بھی متوقع ہے ۔
سینکڑوں باغبانوں اور مزدوروں کی کئی مہینوں کی پیہم محنت کا نتیجہ ہے کہ زائد از۳۰؍ایکٹر اراضی پر محیط اس باغ کو سیاحوں کیلئے ہر لحاظ سے تیار کیا گیا ہے ۔
باغ کو مزید دلکش و دلپذیر بنانے کیلئے امسال ایک واٹر چینل جو باغ کے بیچوں بیچ موجود تھی کو مزید بڑھایا گیا اور اس کے علاوہ باغ میں فواروں کی تعداد میں بھی اضافہ کیا گیا ہے ۔
علاوہ ازیں باغ کی سیر سے لطف اندوز ہونے کئے لئے جسمانی طور معذور اور عمر رسیدہ لوگوں کے لئے ویل چیئرز کو دستیاب رکھا گیا ہے اور دوسری سہولیات کو بھی بڑھایا گیا ہے ۔
امسال سیاح قریب۶۰۰کنال اراضی پر پھیلے اس باغِ گل لالہ میں لگی۶۸؍اقسام کی۱۶لاکھ سے زیادہ ٹیولپ گٹھلیوں کے حسین نظاروں سے محظوظ ہوں گے ۔
وادی کشمیر میں کئی برسوں کے بعد سال گذشتہ ریکارڈ تعداد میں سیاحوں کی آمد دیکھی گئی اور باغ گل لالہ کی سیر ان کی ترجیحات میں تھی۔
قابل ذکر ہے کہ پہلے سراج باغ کے نام سے مشہور اندرا گاندھی میموریل ٹلپ گارڈن کو سال۲۰۰۸میں اس وقت کے وزیر اعلیٰ غلام نبی آزاد نے قوم کے نام وقف کیا تھا۔ باغ گل لالہ کے قیام کا بنیادی مقصد وادی میں شعبہ سیاحت کو مزید فروغ دینا تھا۔
باغ گل لالہ بالی ووڈ فلم سازوں کیلئے بھی محبوب مقام ہے جس کے پیش نظر گذشتہ ایک دہائی کے دوران یہاں کئی فلموں کی شوٹنگ کی گئی۔