سرینگر لہیہ شاہراہ ۶۸ دنوں کی ریکارڈ مدت میں کھول دی گئی:ڈائریکٹر جنرل بی آر او

سرینگر//
سٹریٹجک ۴۳۴کلومیٹر طویل سرینگر،لیہہ ہائی وے کو بارڈر روڈز آرگنائزیشن (بی آر او) نے ریکارڈ۶۸ دنوں میں کھول دیا۔
ہائی وے کو باضابطہ طور پر ٹریفک کیلئے کھولنے کے بعد صحافیوں سے بات کرتے ہوئے ڈائریکٹر جنرل بارڈر روڈز آرگنائزیشن ‘ لیفٹیننٹ جنرل راجیو چودھری نے کہا کہ زوجیلا پاس کو کھولنا ہمیشہ ایک مشکل ترین چیلنج ہوتا ہے۔
لیفٹیننٹ جنرل چودھری کاکہنا تھا’’ یہ بی آر او کے اہلکاروں اور جوانوں کی محنت کی وجہ سے تھا کہ ہم ۶۸ دنوں کی ریکارڈ تعداد میں دھرے کو کھولنے میں کامیاب ہوئے۔ پچھلے تین سالوں سے، ہم اپنے ہی ریکارڈ توڑ رہے ہیں‘‘۔انہوں نے کہا کہ پہلے ۱۱۰ دنوں میں سڑک کھولی گئی، پھر ۷۸ دنوں میں اور اب صرف۶۸ دنوں میں۔
بی آر او کے ڈائریکٹر جنرل نے کہا’’ہماری کوششیں ہوں گی کہ صرف ۶۰ دنوں (دو ماہ) میں سڑک کو مکمل کر کے کھول دیں ‘‘۔ انہوں نے کہا ’’بی آر اوکے اہلکار اور مرد اس علاقے سے پوری طرح واقف ہیں۔ سڑک کھولنے کے عمل کے دوران کسی سامان کو نقصان نہیں پہنچا۔‘‘
لیفٹیننٹ جنرل چودھری نے کہا کہ بی آر او کے ساتھ کام کرنے والے مقامی لوگوں کو گرم کپڑوں کے علاوہ مناسب اجرت، رہائش اور کھانا فراہم کیا جا رہا ہے۔ ’’کچھ لوگ پچھلے ۲۵سالوں سے ہمارے ساتھ کام کر رہے ہیں۔ ہم ایک خاندان کی طرح ہیں‘‘۔
بی آر او کے ڈائریکٹر جنرل نے کہا کہ اس سڑک کو جلد کھولنے سے حکومت کو یومیہ۷ کروڑ روپے بچانے میں مدد ملے گی۔ ’’یہ سڑک لداخ میں فوج کے علاوہ بندوقوں، گولیوں اور ٹینکوں سمیت دفاعی سامان بھیجنے میں مدد کرتی ہے۔ اسی طرح، جلد سڑک کھولنے سے لداخ کے خطے کو معاشی دھکا دینے میں مدد ملتی ہے جو چھ ماہ تک باقی دنیا سے کٹا رہتا ہے‘‘۔
لداخ کے لوگ اس سڑک کے ذریعے سری نگر آجا سکتے ہیں۔ان کا کہنا تھا کہ اس روڈ کے وقت پر کھلنے سے لداخ کی معیشت کو فائدہ ہوتا ہے اور لداخ کے لوگ اس روڈ سے سری نگر آکر اپنا کام کرتے ہیں۔