جموں//
جموں وکشمیر بھارتیہ جنتاپارٹی(بی جے پی) کے صدر‘ رویندر رینا نے پراپرٹی ٹیکس کے معاملے پر لیفٹیننٹ گورنر سے آل پارٹی میٹنگ طلب کرنی چاہے ‘ جس میں سبھی سیاسی تنظیموں کے لیڈران، چیمبر آف کامرس، تاجر برادری اور بار ایسو سی ایشن شامل ہیں کو دعوت دی جانی چاہئے ۔
رینا نے مزید بتایا کہ جائیداد ٹیکس کے معاملے پر لوگوں میں خدشات پائے جارہے ہیں جس کو دور کرنے کی اشد ضرورت ہے اور سرکاری مشینری کو بھی اس حوالے سے عوام میں بیداری مہم چلانی چاہئے ۔
ان باتوں کا اظہاربی جے پی یونت صدر نے جموں میں نامہ نگاروں سے بات چیت کے دوران کیا۔انہوں نے کہاکہ جائیداد ٹیکس کے معاملے پر لیفٹیننٹ گورنر منوج سنہا کو لوگوں کے خدشات دور کرنے چاہئے ۔
رینا نے کہا کہ ۲۰۱۲میں عمر عبداللہ کی سرکار نے کابینہ میں پراپرٹی ٹیکس لاگو کرنے کے حوالے سے میٹنگ طلب کی جبکہ ۲۰۱۷میں محبوبہ مفتی کی سربراہی میں حکومت نے اسمبلی میں بل بھی پاس کی ۔
بی جے پی لیڈر کا کہنا تھا کہ پراپرٹی ٹیکس لاگو کرنے کے پیچھے کون سی مجبوریاں ہیں ایل جی انتظامیہ کو اس حوالے سے سبھی باتیں پبلک ڈومین میں رکھنی چاہئے ۔
رینا نے کہاکہ ملک کی ہر ریاست اور یونین ٹریٹری میں جائیداد ٹیکس لاگو ہے اور یہاں پر اس کو لاگو کرنا کوئی نئی بات نہیں۔انہوں نے مزید کہاکہ شہروں کی ترقی کی خاطر پراپرٹی ٹیکس کا اطلاق ناگزیر تھا ۔
بی جے پی یوٹی صدر نے کہاکہ جیسا کہ ایل جی انتظامیہ نے کہا ہے کہ ایک ہزار سیکوئر فٹ مکان پر یہ ٹیکس لاگو نہیں یعنی شہری علاقوں میں چالیس فیصد آبادی کو اس ٹیکس سے مستثنیٰ رکھا گیا ہے ۔
رینا نے بتایا کہ شہروں میں تعمیر وترقی کے حوالے سے ایل جی منوج سنہا کی مداخلت کے بعد ہی نیتی آیوگ فنڈس واگزار کررہا ہے لہذا پراپرٹی ٹیکس سے جو پیسے جمع ہونگے اُن کو شہروں کی ترقی کی خاطر ہی خرچ کیا جائے گا۔انہوں نے کہاکہ یہ پیسے دہلی نہیں جائیں بلکہ میونسپل کمیٹیوں اور میونسپل کارپوریشنز ان پیسوں کو تعمیر وترقی کے کاموں پر خرچ کریں گے ۔
بی جے پہ یونٹ صدر نے کہاکہ ایل جی سنہا کو اس حوالے سے عوام کے سامنے آکر خدشات دور کرنے چاہئیں اور اس معاملے کو پبلک ڈومین میں رکھنے کی ضرورت ہے ۔انہوں نے کہاکہ میری رائے ہے کہ ایل جی جائیداد ٹیکس پر آل پارٹی میٹنگ طلب کریں اور اس میٹنگ میں سیاسی پارٹیوں کے ساتھ ساتھ بار ایسو سی ایشن ، چمبر آف کامرس اور تاجر برادری سے وابستہ نمائندوں کو مدعو کیا جانا چاہئے تاکہ سبھی خدشات کو دور کیا جاسکے ۔
ایپ ٹیک کے بارے میں پوچھے گئے سوال کے جواب میں رینا نے کہاکہ جموںکشمیر یوٹی کے نوجوان اس کمپنی سے بددل ہو گئے ہیں کیونکہ جس طرح سے سب انسپکٹر اور فائنانس اکاونٹ اسسٹنٹ امتحانات کے پیپر لیک کئے گئے امیدواروں میں ڈر کا ماحول ہے کہ کہیں دوبارہ ایسا نہ ہو۔
رینا نے کہاکہ امیدوار اس وقت احتجاج پر ہیں اور ہم بھی اس بات کے قائل ہیں کہ بھرتی عمل میں ایمانداری سے کام لیا جانا چاہئے ۔انہوں نے کہاکہ جے کے ایس ایس بی کے چیرمین راجیش شرما نے گزشتہ روز ہی پریس کانفرنس کے دوران واضح کیا کہ امتحانات ایمانداری سے لئے جائیں گے ۔انہوں نے کہاکہ نوجوانوں کے دل میں جو پریشانی ہے اُس کو دو ر کرنے کی ضرورت ہے ۔
بی جے پی لیڈر نے مزید بتایاکہ چوری، جعلسازی کرنے والے آفیسران کو گھسیٹ گھسیٹ کر جیلوں میں بند کیاجانا چاہئے ۔