کولگام تصادم میں پاکستانی سمیت دو جنگجو ہلاک ، دو پولیس اہلکار زخمی:آئی جی کشمیر

سرینگر/۱۱؍اپریل
جموںکشمیر کے ضلع کولگام کے کھور بٹہ پورہ گاؤں میں جنگجووں اور سیکورٹی فورسز کے مابین تصادم میں۲جنگجو مارے گئے جبکہ ابتدائی گولیوں کے تبادلے میں دو پولیس اہلکار زخمی ہوئے ہیں۔
آئی جی کشمیر نے بتایا کہ کولگام میں جاری تصادم آرائی میں ایک پاکستانی اور ایک ہابئیرڈ ملی ٹینٹ مارا گیا۔
آئی جی کشمیر وجے کمار نے تصادم کے حوالے سے جانکاری فراہم کرتے ہوئے بتایا کہ کولگام کے کھور بٹہ پورہ گاوں میں سیکورٹی فورسز کے ساتھ تصادم میں دو جنگجو مارے گئے ہیں۔انہوں نے بتایا کہ جاں بحق جنگجو گزشتہ ہفتے چیک صمد علاقے میں سیکورٹی فورسز کو چکمہ دے کر فرار ہونے میں کامیاب ہوئے تھے ۔
انسپکٹر جنرل آف پولیس کشمیر رینج نے بتایا کہ پچھلے دو دنوں کے دوران سری نگر اور کولگام میں تصادم آرائیوں کے دوران تین پاکستانی جنگجووں کو مار گرایا گیا ہے ۔انہوں نے کہاکہ علاقے میں جنگجو مخالف آپریشن جاری ہے ۔
اس سے پہلے پولیس ذرائع نے بتایا کہ کولگام کے کھور بٹہ پورہ گاوں میں جنگجوؤں کی موجودگی کی اطلاع موصول ہونے کے بعد سیکورٹی فورسز نے پیر کی سہ پہر علاقے کو محاصرے میں لے کر جنگجو مخالف آپریشن شروع کیا۔
ذرائع نے بتایا کہ سیکورٹی فورسز کے اہلکار وں نے جوں ہی مشتبہ مقام کی اور پیش قدمی شروع کی تو وہاں پر موجود جنگجووں نے حفاظتی عملے پر اندھا دھند فائرنگ شروع کی۔انہوں نے کہا سلامتی عملے نے بھی پوزیشن سنبھال کر جوابی کارروائی کا آغاز کیا جس دوران دو ملی ٹینٹ مارے گئے جن میں سے ایک پاکستان کا ساکن ہے ۔
پولیس ذرائع نے بتایا کہ ملی ٹینٹوں کی ابتدائی فائرنگ میں دو پولیس اہلکار زخمی ہوئے جنہیں علاج ومعالجہ کی خاطر نزدیکی ہسپتال منتقل کیا گیا۔انہوں نے بتایا کہ تصادم کی جگہ اسلحہ وگولہ بارود اور قابل اعتراض مواد برآمد کرکے ضبط کیا گیا۔