ٹی ۵ ٹنل ۱۵ مارچ سے ٹریفک کیلئے کھول دی جائیگی

سرینگر//
سرینگر جموں قومی شاہراہ پر تعمیر ہو رہی۸۶۵میٹر طویل پنتھال ٹنل(ٹی۵)کو ۱۵مارچ سے ٹریفک کیلئے کھول دیا جا ئے گا۔
حکام کا کہنا ہے کہ اس ٹنل کا تعمیری کام آخری مرحلے میں ہے ۔انہوں نے کہا کہ ٹنل کو۱۵مارچ سے ٹریفک کیلئے کھول دیا جائے گا۔
ان کا کہنا تھا کہ اس ٹنل سے لوگوں کو شاہراہ پر چٹانیں کھسک آنے سے بند رہنے کی مصیبت سے راحت نصیب ہوگی۔
سرکاری ذرائع نے بتایاکہ سرینگر جموں شاہراہ پر پنتھال کے مقام پر ہی اکثر و بیشتر حادثات رونما ہوتے ہیں جس کو مد نظر رکھتے ہوئے سرکار نے ٹی۵ٹنل کا کام کئی برس قبل ہاتھ میں لیا اور۱۵مارچ ۲۰۲۳کے روز اس ٹنل کو عوام کے نام وقف کیا جائے گا۔انہوں نے کہاکہ ۸سو میٹرلمبی اس ٹنل کو ٹی ۵نام دیا گیا ہے ۔
ایک سینئر عہدیدار نے بتایا کہ سرینگر جموں شہر پر پنتھال کا حصہ پتھرکھسک آنے کی وجہ سے مسافروں کیلئے پریشانی کا باعث ہے ۔انہوں نے کہاکہ نیشنل ہائی وے اتھارٹی آف انڈیا کے انجینئروں نے اس پر کام مکمل کیا اور اس ٹنل کو۱۵مارچ کے روز کھول دیا جائے گا۔
عہدیدار کے مطابق رام بن سے بانہال کے درمیان شاہراہ کے اہم حصوں پر چار سو اور آٹھ سو میٹر کی تین سرنگیں تعمیر کی جانی تھیں۔انہوں نے کہاکہ گر چہ ٹنل کی تعمیر سے فاصلہ کم نہیں ہوگا لیکن پنتھال اسٹریچ کا مسئلہ ہمیشہ ہمیشہ کیلئے حل ہو جائے گا۔
اُن کا مزید کہنا تھا کہ معمولی بوندا باندھی کے ساتھ ہی پنتھال کے مقام پر چٹانیں کھسک آنے کی وجہ سے شاہراہ پر ٹریفک کی آمدورفت کو روکنا پڑتا تھا لیکن نئی ٹنل کو آپریشنل کرنے کے بعد یہ مسئلہ حل ہو جائے گا۔
عہدیدارنے بتایا کہ ٹی۵ٹنل کے بعد قومی شاہراہ پر رام بن اور ڈگڈول میں دو ٹیوبز پر بھی کام بہت جلد شروع ہوگا۔