ترکیہ اور شام میں اب بھی بچاؤ کارروائیاں جاری ہیں اور… اور ایک بڑی تعداد میں لوگ ملبے میں دبے ہوئے ہیں …جن کے بچنے کے امکانات اب ہر گھڑی گزرنے کے ساتھ کم ہو تے جا رہے ہیں… ختم ہو تے جا رہے ہیں… لیکن… لیکن اتنے بڑے پیمانے پر ہوئی تباہی میں بھی اللہ میاں نے جسے زندہ رکھنا ہے‘ جس کو مزید مہلت دینے ہے … وہ یقینا مہلت پائیگا اور… اور زندہ بچ جائیگا ۔ شام کے ایک علاقے ‘ جو باغیوں کے قبضے میں ہے‘ میں ایک مکان کے ملبے سے ایک نوزائیدہ بچی کو زندہ بر آمد کر لیا گیا … بچی زلزلے کے دوران ہی پیدا ہو ئی تھی … اس کی نال ماں سے جڑی ہو ئی تھی… مردہ ماں کے جسم سے ۔بعض اوقات اللہ میاں کے فیصلے… ہم عام انسانوں کی عقل و دانش اور شعور سے باہر ہو تے ہیں ‘ جنہیں سمجھنا ہم انسانوں کے بس میں نہیں ہے اور… اور اس لئے نہیں ہے کیونکہ ہمارا علم محدود… بہت ہی محدود ہے اور… اور اللہ میاں کا علم لامحدود‘ اس کی کوئی انتہا ہی نہیں … زلزلے میں اس بچی کے خاندان کا مکمل صفایا ہوا … اس کے والدین ‘چار بھائی بہن اور خالہ ملبے سے زندہ بر آمد نہیں کئے جا سکے… اس نوزائیدہ بچی کو ایک ہسپتال میں داخل کیا گیا ہے‘ جہاں اس کے کچھ زخموں کا علاج چل رہا ہے … یہ بچی نہ صرف اس تباہ کن زلزلے میں زندہ بچ نکلی بلکہ اس نے شدید ٹھنڈ اور سرد ی کا بھی مقابلہ کیا … ٹھنڈ اتنی کہ اس کا سارا جسم نیلا پڑ گیا تھا اور … اور ہسپتال میں سب سے پہلے اس کو کوئی دوائی ‘ کوئی مرہم پٹی نہیں بلکہ اس کیلئے گرمی کا انتظام کیا گیا ۔ اس تباہ کن زلزلے میں ترکیہ اور شام میں اب تک کم از کم۱۱ ہزار لوگ مر گئے ہیں… کئی خاندانوں کا نام و نشان مٹ گیا ‘ ہزاروں اور لاکھوں لوگوں کی زندگیاں ایک دم بدل گئیں ‘ ان کی دنیا لٹ گئی … ایسے میں اس بچی… نو زائیدہ بچی کا زندہ بچ نکلنا … ایک بار پھر اس بات کی دلیل ہے کہ … کہ اللہ میاں جسے زندہ رکھے اسے کوئی چھو بھی نہیں سکتا ہے اور… اور جس کی موت کا وقت آگیا ہو… وہ محفوظ سے محفوظ ترین مقام سے بھی موت سے فرار حاصل نہیں کر سکتا ہے اور… اور بالکل بھی نہیں سکتا ہے ۔ ہے نا؟
