نئی دہلی//سپریم کورٹ نے پیر کو کہا کہ وہ لکشمن چندر وکٹوریہ گوری کو مدراس ہائی کورٹ کے ایڈیشنل جج کے طور پر تقرری کی سفارش کرنے کے کالجیم کے فیصلے کے خلاف دائر درخواست کی سماعت 10 فروری کو کرے گی۔
چیف جسٹس ڈی وائی چندرچوڑ کی سربراہی والی بنچ نے سینئر ایڈوکیٹ راجو رام چندرن کی عرضی کی سماعت سے اتفاق کرتے ہوئے معاملے کو جمعہ کو درج کرنے کی ہدایت دی۔
خصوصی ذکر کے دوران مسٹر رام چندرن نے عرضی کی جلد سماعت کی استدعاکی تھی۔
رام چندرن نے بنچ کو بتایا کہ ایڈیشنل جج کی تقرری کے سلسلے میں مدراس کے سینئر وکلاء کے ایک گروپ کی طرف سے ایک درخواست دائر کی گئی ہے ۔ وہ درخواست پر فوری سماعت اور عبوری راحت کی استدعا کررہے ہیں۔
مرکزی وزیر قانون اور انصاف کرن رجیجو نے پیر کے روز 13 ایڈیشنل ججوں کی تقرری کے بارے میں معلومات ٹویٹ کی، جن میں لکشمن چندر وکٹوریہ گوری کا نام بھی شامل ہے ۔
مدراس ہائی کورٹ کے وکلاء کے ایک گروپ نے گوری کی مجوزہ تقرری کی مخالفت کی ہے ۔ ان کا الزام ہے کہ وہ بھارتیہ جنتا پارٹی سے وابستہ تھیں۔