ریلوے نے رواں سال اکتوبر میں مال برداری کا نیا ریکارڈ قائم کیا، 14.51 کروڑ ٹن سامان کی ڈھلائی

نئی دہلی، 4 نومبر (یواین آئی) ریلوے نے رواں سال اکتوبر کے مہینے میں تقریباً 14.51 کروڑ ٹن سامان کی ریکارڈ ڈھلائی کی ہے اور 64.72 کروڑ مسافروں کو ان کی منزل تک پہنچایا ہے۔
ریلوے کی جانب سے بدھ کو جاری ایک بیان کے مطابق اکتوبر 2026 میں ریلوے نے 14 کروڑ 50 لاکھ 70 ہزار ٹن سامان کی ڈھلائی کی، جو ریلوے کی جانب سے اب تک کسی ایک مہینے میں مال برداری کا نیا ریکارڈ ہے۔ گزشتہ سال اکتوبر میں تقریباً 13.4 کروڑ ٹن سامان کی ڈھلائی کی گئی تھی۔ اس طرح اس سال اکتوبر میں مال برداری میں سالانہ بنیاد پر 8.32 فیصد اضافہ درج کیا گیا۔
رواں سال اکتوبر کے مہینے میں ریلوے کے ذریعے غذائی اجناس کی ڈھلائی میں سالانہ بنیاد پر 26.3 فیصد، گھریلو کوئلے کی ڈھلائی میں 16 فیصد اور دیگر اشیا کی ڈھلائی میں 11 فیصد اضافہ ہوا۔ اس ماہ کے دوران کلنکر کی ڈھلائی میں سالانہ بنیاد پر 10.4 فیصد، گھریلو کنٹینروں میں 6.3 فیصد، خام لوہے میں 5 فیصد، معدنی تیل میں 1.9 فیصد اور تیار فولاد کی ڈھلائی میں 0.5 فیصد اضافہ ریکارڈ کیا گیا۔
بجلی گھروں کی بڑھتی ہوئی مانگ پوری کرنے کے لیے ریلوے نے گھریلو کوئلے کی ریل کے ذریعے ترسیل میں نمایاں اضافہ کیا ہے۔ اکتوبر کے مہینے میں ریلوے نے روزانہ اوسطاً 469.8 ریک کوئلہ پہنچایا، جبکہ گزشتہ سال اسی مدت میں یہ تعداد 393.2 ریک تھی۔ اس طرح ریک کی تعداد کے لحاظ سے کوئلے کی فراہمی میں 19.5 فیصد اضافہ درج کیا گیا۔
اکتوبر میں ریلوے کی مال برداری کی اس شاندار کارکردگی کی بنیاد مالی سال 2026-27 کے پہلے سات ماہ (اپریل تا اکتوبر) کے دوران مجموعی مال برداری میں درج ہونے والا خاطر خواہ اضافہ ہے۔ اس مدت میں ریلوے نے تقریباً 97.88 کروڑ ٹن سامان کی ڈھلائی کی، جو گزشتہ سال اسی مدت میں 93.51 کروڑ ٹن تھی۔ اس طرح اس میں 4.67 فیصد اضافہ ہوا۔
رواں سال اکتوبر میں ریل کے ذریعے مسافروں کی آمد و رفت میں بھی اضافہ درج کیا گیا۔ اکتوبر کے مہینے میں 64.72 کروڑ مسافروں کو ان کی منزل تک پہنچایا گیا، جبکہ گزشتہ سال اسی مہینے میں 63.52 کروڑ مسافروں نے ریل کے ذریعے سفر کیا تھا۔
موجودہ مالی سال میں اپریل سے اکتوبر کے سات ماہ کے دوران ریلوے نے 443.8 کروڑ مسافروں کو ان کی منزل تک پہنچایا، جبکہ گزشتہ سال اسی مدت میں 431.4 کروڑ مسافروں نے سفر کیا تھا۔ غیر مضافاتی مسافر زمرے میں مسافروں کی تعداد میں 4.2 فیصد، جبکہ مضافاتی مسافر زمرے میں 1.7 فیصد اضافہ درج کیا گیا۔
ریلوے کے مطابق مال برداری میں اضافہ اس کے لاجسٹکس نظام کو مضبوط بنانے اور ملک کی اقتصادی ترقی میں تعاون دینے کے عزم کی عکاسی کرتا ہے۔ گنجائش میں توسیع اور آپریشنل کارکردگی کو بہتر بنانے کے ذریعے ہندوستانی ریلوے اپنے نقل و حمل کے نیٹ ورک کو مسلسل بہتر بنا رہا ہے۔