کہنے والوں کاکہنا ہے کہ دنیا میں مسلمانوں کی تعداد میں تیزی سے اضافہ ہو تا جارہاہے… سب سے تیز اضافہ … اتنا تیز اضافہ کہ دنیا میں ہر چوتھا شخص مسلمان ہے… اور ہمیں اس بات پر کوئی شک نہیں ہے اور… اور بالکل بھی نہیں ہے… یقینا دنیا کا ہر چوتھا ئی شخص مسلمان ہے… اس میں بھی شک نہیں ہے کہ دنیا میں مسلمان سب سے زیادہ تعداد میں ہیں ۔ہر چوتھا شخص عقیدے کے اعتبار سے مسلمان ہے ۔ یہ اچھی بات ہے ‘ ما شا ء اللہ مسلمانوں کو کسی کی نظر بد نہ لگ جائے ‘ سچ میں یہ اچھی خبر ہے ۔ لیکن بات یہیں پرختم نہیں ہو تی ہے اور… اور بالکل بھی نہیں ہو تی ہے اور… اور اس لئے نہیںہو تی ہے کیونکہ … دنیا میں سب سے زیادہ بدعنوانوں کی تعدادمسلمان کی ہے ‘ دنیا میں دہشت گردوں کی سب سے زیادہ تعداد مسلمان ہے‘ دنیا میں سب سے زیادہ بے کار لوگ مسلمان ہیں ‘ دنیا میں سب سے زیادہ جھوٹے ‘ فریبی ‘ مکار اور دھوکے باز مسلمان ہیں ۔جب برسو ں سے اپنے بارے میں ‘ مسلمانوں کے بارے میں یہی باتیں سنتے اور پڑھتے آئے ہوں تو کس کو یہ جملہ’’دنیا میں سب سے زیادہ تعداد مسلمانوں کی‘‘ نامکمل نہ لگے ؟ … سو مجھے بھی لگا ۔آپ یا میں ان باتوں کو مسلمانوں اور اسلام کو بدنام کرنے کی سعی بھی قرار دے سکتے ہیں اور اگر آپ ایسا کریں تو ہمیں کوئی اعتراض نہیں ۔لیکن ذرا اس بات پر بھی تو غور کیجئے کہ اگر ہر چوتھا شخص مسلمان ہے تو پھر ہمارے کتنے کالیج ‘ کتنے سکول ‘ یونیورسٹیاں اور پیشہ وارانہ ادارے بین الاقوامی معیار کے ہیں ؟کتنے شفاء خانے معیاری طبی سہولیات فراہم کرتے ہیں ؟ ہمارے اپنے کتنے سائنسی تحقیقی ادار ہیں ؟ دنیا کی سیاست میں ہمارا اثر و رسوخ کتنا ہے ‘ بیشتر قدرتی وسائل ہمارے پاس موجود ہو نے کے باوجود بھی ہم اتنے پسماندہ کیوں ہیں ؟آپ کی اور ہماری آج جو حالت ہے اس کیلئے صرف عیسائی ‘ یہودی ‘ ہندو ذمہ دار ہیں یا خود ہم اس کی ایک بنیادی وجہ ہے ؟تعداد میں ہم سب سے زیادہ ہوں لیکن ہمیں جومسائل اور مشکلات ہیں‘اس میں بھی ہم کسی سے پیچھے نہیں ہیں … کسی سے بھی نہیں۔ہے نا؟
