’آوارہ کتوں کی بڑھتی آبادی کو کنٹرول کرنے کیلئے کئی اقدام کئے جا رہے ہیں‘

سرینگر//
سرینگر میونسپل کارپوریشن (ایس ایم سی) کے کمشنر‘ اطہر عامر خان کا کہنا ہے کہ شہر میں آوارہ کتوں کی آبادی کو کنٹرول کرنے کیلئے کئی اقدام کئے جا رہے ہیں۔
خان نے کہا کہ سرینگر کے ٹینگ پورہ میں قائم کتوں کے نسبندی فیسلٹی پر لگ بھگ۸۰فیصد کام مکمل ہوچکا ہے ۔
ایس ایم سی کے کمشنر نے ان باتوں کا اظہار یہاں جمعے کو نامہ نگاروں کے ساتھ بات کرنے کے دوران کیا۔
خان نے کہا’’کارپوریشن شہر میں آورہ کتوں کی آبادی کو کنٹرول کرنے کیلئے سخت محنت کر رہا ہے اور اس ضمن میں کئی اقدام کئے جا رہے ہیں‘‘۔ان کا کہنا تھا کہ کتوں کی نسبندی کے دو مزید سینٹر قائم کئے گئے ہیں جن میں سے ٹینگ پورہ میں قائم فیسلٹی کا لگ بھگ۸۰فیصد کام مکمل ہوچکا ہے ۔
ایس ایم سی کمشنر نے کہا کہ کتوں کی پیدائش پر قابو پانے کیلئے نس بندی فیسلٹز میں مزید گنجائش پیدا کرنے کی کوشش کی جا رہی ہے اور اس سلسلے میں کچھ غیر سرکاری تنظیموں کے ساتھ بھی کام کیا جا رہا ہے تاکہ شہر میں کتوں کی بڑھتی آبادی کو کنٹرول کیا جا سکے ۔
خان نے کہا کہ اس کے علاوہ شہر بھر میں کوڑے دان کم کرنے اور ہٹانے کی کوشش کی جا رہی ہے جہاں کتے اور دوسرے جانور جمع ہوتے ہیں جس کیلئے ہر گھر کو کوڑا دان فراہم کرنے کے لئے در در مہم چلائی جا رہی ہے ۔
بتادیں کہ آوارہ کتوں کی ہڑبونگ نے شہر و گام کے لوگوں کو پریشان کر دیا ہے ۔
لوگوں کا کہنا ہے کہ سڑکوں اور گلی کوچوں میں آوارہ کتوں کا راج ہے جس سے بزرگوں خواتین خاص کر بچوں کا گھروں سے نکلنا پُر خطر بن گیا ہے ۔
سوشل میڈیا پر بھی ایسی ویڈیوز گشت کر رہی ہیں جن میں دیکھا جا رہا ہے کہ کئی علاقوں میں سڑکوں پر کتوں کا راج ہے اور خاص طور پر کوڑے دانوں کے ارد گرد بڑی تعداد میں کتے جمع ہیں جو راہگیروں کیلئے انتہائی خطر ناک ثابت ہوسکتا ہے ۔