ایس آئی سی او پی کا افسر مبینہ طور رشوت لیتے ہوئے گرفتار

سرینگر//
جموںکشمیر اینٹی کورپشن بیورو (اے سی بی) نے ایک تجارتی یونٹ ہولڈر کی شکایت پرجنوبی کشمیر کے ضلع شوپیاں میں ایک سمال اسکیل انڈسٹریز ڈیولوپمنٹ کارپوریشن (ایس آئی سی او پی) کے افسر کو مبینہ طور رشوت لیتے ہوئے گرفتار کیا۔
ایک اے سی بی عہدیدار نے بتایا کہ اے سی بی کو شوپیاں سے تعلق رکھنے والے ایک تجارتی یونٹ ہولڈر کی طرف سے شکایت موصول ہوئی جس میں کہا گیا اس کا گگرن شوپیاں میں والد کے نام پر ایک تجارتی یونٹ تھا جس کے لئے ان کو سال۲۰۰۹میں ایک کنال اراضی الاٹ کی گئی تھی لیکن اس کے قبضے میں صرف۱۱مرلے اراضی ہے ۔
عہدیدارنے مزید کہا’’باقی نو مرلہ اراضی پر کسی تیسرے شخص نے قبضہ کیا ہے اور ضلع مجسٹریٹ شوپیاں نے ایس آئی سی او پی کو ہدایت بھی دی تھی کہ یہ اراضی تجارتی یونٹ ہولڈر کے قبضے میں دینے کو یقینی بنایا جائے ‘‘۔
ان کا کہنا تھا’’تجارتی یونٹ ہولڈر نے ایس آئی سی او پی کواس کو پولیس تحفظ فراہم کرنے کی بھی گذارش کی تھی‘‘۔
اے سی بی عہدیدارنے کہا کہ تاہم جب شکایت کنندہ نے ایس آئی سی او پی کے ڈپٹی جنرل منیجر‘ محمد ایوب گنائی سے رابطہ کیا تو انہوں نے مبینہ طور پندرہ ہزار روپے رشوت کا تقاضا کیا۔انہوں نے کہا’’شکایت کے مطابق طرفین میں آٹھ ہزار روپے پر معاملہ طے ہوا‘‘۔
عہدیدار کا کہنا تھا کہ شکایت پر اے سی بی پولیس اسٹیشن اننت ناگ میں ایک کیس درج کیا گیا اور موصوف کو رشوت لیتے ہوئے پکڑا گیا۔