اب اگر نیشنل کانفرنس نے اپنی ساری بیماریوں کا علاج ڈاکٹر صاحب میں ہی تلاش کر لیا ہے تو… تو کوئی کیا کر سکتا ہے … اگر کسی کو مرچیں لگ رہی ہیں تو … تو لگنے دیجئے کہ بالآخر یہ فیصلہ این سی کو ہی کرنا تھا … اسی کو یہ اختیار تھا کہ وہ اپنی کشتی… ڈگمگاتی اور ہچکولے کھاتی کشتی کا نا خدا کسے بنائے اور… اور کسے نہیں ۔ڈاکٹر صاحب دو بارہ نیشنل کانفرنس کے صدر منتخب… بلا مقابلہ منتخب ہو ئے ہیں‘ اس کیلئے انہیں مبارکباد… لیکن … لیکن اصل میں یہ کسی اور بات کیلئے مبارکباد کے مستحق ہیں اور… اور اس لئے ہیں کیونکہ انہوں نے ایک سچ کہا ‘اپنی ایک غلطی … غلط فیصلے کا اعتراف بھی کیا اور… اور اس عمر میں اگر کوئی سیاستدان سچ کہہ کر اپنی کسی غلطی کا اعتراف کرے تو… تو قسم اللہ میاں کی یہ کوئی معمولی بات نہیں ہے اور… اور بالکل بھی نہیں ہے ۔ ڈاکٹر صاحب نے بغیر کسی لگی لپٹی کے کہا کہ ۲۰۱۸ میں پنچایتی انتخابات کا بائیکاٹ کا فیصلہ صحیح نہیں تھا … اور بالکل بھی نہیں تھا ۔ڈاکٹر صاحب نے اسی پراکتفا نہیں کیا بلکہ انہوں نے اس بات کا بھی اعلان کیا کہ آئندہ ان کی جماعت کسی بھی الیکشن کا بائیکاٹ نہیں کریگی اور… اور بالکل بھی نہیں کریگی … اور ہاں انہوں نے سٹیج سے اپنے بیٹے ‘ گورے گورے بانکے چھورے کو آئندہ اسمبلی الیکشن لڑنے کا بھی حکم دیا … وہ کیا ہے کہ عمر عبداللہ اعلان کر چکے تھے کہ …کہ وہ اسمبلی الیکشن نہیں لڑیں گے ۔ہم … ہم کشمیریوں میں کئی ایک مسئلے ہیں ‘ کئی ایک خامیاں ہیں‘کئی ایک نقائص ہیں … ان میں ایک مسئلہ‘ ایک خامی ‘ ایک نقص…’بائیکاٹ‘ کا بھی ہے ۔جب ہمیں کچھ دکھائی نہیں دیتا ہے … یعنی جب ہماری عقل ‘ ہماری منطق ‘ہمارا فہم ‘ہمارا ادراک‘ ہماری فیصلہ لینے کی قوت جواب دیتی ہے تو… تو ہم ’بائیکاٹ‘ کا سہارا لیتے ہیں… ہم اپنی اسپیس کسی دوسرے کو سونپ دیتے ہیں۔بات صرف پنچایتی انتخابات کے بائیکاٹ کی نہیں ہے … ڈاکٹر صاحب کو اس بات کا بھی اعتراف کرنا چاہئے تھا کہ پہلے پہل حد بندی کمیشن کی میٹنگوں کا بائیکاٹ کرنا بھی صحیح فیصلہ نہیں تھا اور… اور اس لئے نہیںتھا کیونکہ ان کے بائیکاٹ کرنے سے حد بندی کا عمل التوا میں نہیں پڑا… یہ رک نہیں گیا… اور بالکل بھی نہیں رک گیا ۔خیر !ڈاکٹر صاحب کی سمجھ میں یہ بات آگئی ہے‘ دیر سے ہی سہی آگئی ہے… اس لئے ہمیں یقین ہے کہ این سی ہی نہیں بلکہ دوسری جماعتیں بھی آئندہ بائیکاٹ نہیں کریں گی بلکہ …بائیکاٹ کا ہی بائیکاٹ کریں گی… ہمیشہ ہمیشہ کیلئے ۔ ہے نا؟
