فوجیوں اور ان کے خاندانوں کی فلاح و بہبود ہر شہری کی ذمہ داری ہے : راجناتھ

نئی دہلی// وزیر دفاع راج ناتھ سنگھ نے مسلح افواج کے فلیگ ڈے فنڈ میں دل کھول کر حصہ ڈالنے کی ملک کے باشندوں سے اپیل کرتے ہوئے کہا کہ فوجیوں اور ان کے اہل خانہ کی فلاح و بہبود کو یقینی بنانا ہر شہری کی اخلاقی ذمہ داری ہے ۔
منگل کو یہاں وزارت دفاع کے سابق فوجیوں کی بہبود کے محکمے کے زیر اہتمام مسلح افواج کے فلیگ ڈے ‘سی ایس آر’ کنونشن سے خطاب کرتے ہوئے مسٹر سنگھ نے مسلح افواج کے ریٹائرڈ اور حاضر سروس اہلکاروں کا شکریہ ادا کیا اور کہا کہ ان کی بہادری اور قربانی نے ملک کی خودمختاری اور سالمیت کا تحفظ کیا ہے ۔
وزیر دفاع نے ناگالینڈ میں کوہیما سمر میموریل میں ایک سپاہی کے پیغام کا خصوصی ذکر کیا جس میں لکھا تھاکہ ‘جب آپ گھر جائیں تو انہیں ہمارے بارے میں بتائیں اور کہیں، آپ کے کل کے لیے ، ہم نے اپنا آج دیا’۔ انہوں نے کہا کہ فوجیوں اور ان کے اہل خانہ کی مدد کرنا قوم کی اجتماعی ذمہ داری ہے ۔
وزیر دفاع نے کہاکہ "آزادی کے بعد سے جنگیں جیتنا ہوں یا سرحد پار دہشت گردانہ سرگرمیوں سے نمٹنا ہمارے سپاہیوں نے ہمت اور تندہی کے ساتھ تمام چیلنجوں کا جواب دیا ہے ۔ اس کام میں ان میں سے بہت سے لوگوں نے عظیم قربانی دی اور بہت سے جسمانی طور پر معذور ہو گئے ۔ ان کے خاندان کی پوری ذمہ دار ان پر ہے ۔ لہذا، یہ ہماری بنیادی ذمہ داری ہے کہ ہم آگے آئیں اور اپنے فوجیوں اور ان کے خاندانوں کی ہر ممکن مدد کریں۔ یہ ہمارے بہادر سپاہیوں کی وجہ سے ہے جو سرحدوں پر ہمیشہ چوکس رہتے ہیں، ہم سکون سے سوتے ہیں اور بغیر کسی خوف کے اپنی زندگی گزارتے ہیں۔”
مسٹر سنگھ نے کہا کہ بڑی تعداد میں فوجی اہلکار 35 سے 40 سال کی عمر کے گروپ میں ریٹائر ہوتے ہیں تاکہ مسلح افواج کے نوجوان پروفائل کو برقرار رکھا جاسکے ۔
ملک کے بہادر سپاہیوں کی فلاح و بہبود کے تئیں حکومت کے عزم کا اعادہ کرتے ہوئے مسٹر سنگھ نے کہا کہ اس سمت میں کئی اقدامات کئے گئے ہیں۔ ان اقدامات میں ‘بھارت کے ویر’ پورٹل شامل ہے ، جو مرکزی مسلح پولیس فورس کے افسران اور جوانوں کی فلاح و بہبود کے لیے شروع کیا گیا تھا۔ حال ہی میں، ‘ماں بھارتی کے سپوت’ ویب سائٹ بھی وزیر دفاع نے مسلح افواج کے جنگی زخمیوں کی فلاح و بہبود کے فنڈ میں حصہ ڈالنے کے لیے شروع کی ہے ۔