مرمو کھونٹی میں برسا منڈا کے مجسمے پر گلہائے عقیدت پیش کریں گی

نئی دہلی// قبائلی امور کے مرکزی وزیر ارجن منڈا نے ہفتہ کو کہا کہ صدر دروپدی مرمو 15 نومبر کو جھارکھنڈ میں بھگوان برسامنڈا کے آبائی گاؤں کھونٹی میں ان کے مجسمے پر پھول چڑھائیں گی اور قبائلی خواتین کی رضاکارانہ تنظیموں کے نمائندوں سے ملاقات کریں گی۔
مسٹر منڈا نے یہاں نامہ نگاروں کو بتایا کہ محترمہ مرمو تمام قبائلی آزادی پسندوں کو خراج عقیدت پیش کرنے اور قبائلی علاقوں اور برادریوں کی سماجی و اقتصادی ترقی کی کوششوں کو دوبارہ متحرک کرنے کے لیے منائے جا رہے قبائلی فخر ڈے کے موقع پرکھونٹی گاؤں میں منعقدہ پروگراموں میں شرکت کریں گی۔
انہوں نے کہا کہ نائب صدر جگدیپ دھنکھڑ 15 نومبر کو پارلیمنٹ ہاؤس کے احاطے میں بھگوان برسا منڈا کے مجسمے پر پھول چڑھائیں گے ۔ اس کے علاوہ اس دن مختلف ریاستی دارالحکومتوں اور دیگر شہروں میں ریاستی حکومتوں اور ریاستی قبائلی تحقیقی اداروں کے تعاون سے نوجوانوں اور قبائلی فنکاروں کے مارچ کے انعقاد کے علاوہ ثقافتی پروگراموں، سیمیناروں، ورکشاپس کا انعقاد، مضمون نویسی، گیت، رقص، کھیل اور پینٹنگ کے مقابلے اورصفائی مہم جیسے مختلف پروگراموں کا بھی منصوبہ بنایا گیا ہے ۔
انہوں نے بتایا کہ ملک بھر میں کئی مقامات پر قائم 392 ایکلویہ ماڈل ریزیڈنشیل اسکولوں کے ذریعہ منعقد کی جانے والی سرگرمیوں کی ایک سیریز کے ساتھ ان پروگراموں کا ایک کیلنڈر بھی جاری کیا جائے گا۔ تحریک آزادی میں قبائلی آزادی پسندوں کے تعاون کے موضوع پرمختلف اسکولوں میں سیمینار، ویبنار، مذاکروں کا انعقاد کیا جائے گا۔ قبائلی فخر ڈے 2022 کے موقع پرٹی آرآئی ایف ای ڈی نے قبائلی مصنوعات پر آل انڈیا پروگرام منعقد کیے ہیں۔
ایک سوال کے جواب میں مسٹر منڈا نے کہا کہ قبائلی بہبود سے متعلق محکموں میں خالی آسامیوں کو پر کرنے کے لیے متعلقہ ایجنسیوں کو ہدایات دی گئی ہیں۔ ایکلویہ ماڈل رہائشی اسکولوں میں سی بی ایس ای کی طرز پر تعلیم فراہم کرنے کے فیصلے کے بعد ان میں سی بی ایس ای اسکولوں کی طرز پر اساتذہ کی بھرتی کی جارہی ہے ۔
انہوں نے کہا کہ ان اسکولوں میں تیر اندازی کے لیے خصوصی انتظامات کیے گئے ہیں اور بہت سے ہونہار طلبہ تیر اندازی میں شاندار کارکردگی کا مظاہرہ کر رہے ہیں۔