تو صاحب خبر … ایک دم تازہ خبر یہ ہے کہ اپنے گورے گورے بانکے چھورے عمرعبداللہ صاحب اسمبلی انتخابات میں حصہ نہیں لے رہے ہیں… نہیں جناب !ابھی اسمبلی انتخابات کے انعقادکا اعلان نہیں کیا گیا ہے… جب بھی اور جس بھی صدی میں ان کے انعقاد کا اعلان کیا جائیگا ‘ اپنے گورے گورے بانکے چھورے ان میں حصہ نہیں لیں گے… ہار کے ڈر سے نہیں ‘ بلکہ اس لئے کہ اب جموں کشمیر ایک ریاست نہیں رہی‘ یو ٹی بن گئی ہے اور… اور اپنے عمرصاحب سمجھتے ہیں کہ یہ ان کے شایان شان نہیں ہے اور… اور بالکل بھی نہیں ہے کہ وہ یو ٹی میں انتخابات لڑیں … اس لئے یہ جناب اسمبلی انتخابات میں حصہ نہیں لیں گے اور… اور اُس دن کا انتظار کریں گے جب یو ٹی کو واپس ریاست جموں کشمیر میں تبدیل کیا جائیگا … ہماری اللہ میاں سے دُعا ہے… مخلصانہ اور عاجزانہ دُعا ہے کہ وہ اپنے گورے گورے بانکے چھورے کو لمبی عمر دے… اتنی کہ یہ جناب یو ٹی کو واپس ریاست میں بدلتا ہوا صرف دیکھ ہی نہیں بلکہ اس میں الیکشن بھی لڑ سکیں … ہماری دُعا ہے کہ اللہ میاں ہماری اس دُعا کو قبول فرمائیں ۔ ہمیں گورے گورے بانکے چھورے کے اس فیصلے پر کوئی اعتراض نہیں ہے اور… اور بالکل بھی نہیں ہے ‘ لیکن ایک بات جو ہماری سمجھ میں نہیں آ رہی ہے اور… اور بالکل بھی نہیں آ رہی ہے وہ یہ ہے کہ یہ کیا بات ہوئی عمر عبداللہ خود یو ٹی کے الیکشن سے دور رہیں گے ‘ لیکن اپنی پارٹی ‘ جس کے وہ نائب صدر ہیں ‘ جس کے وہ روح رواں ہیں‘ جس پارٹی کی وجہ سے ان کی ایک شناخت ہے ‘ جس پارٹی نے انہیں وزیر اعلیٰ بنا دیا ‘ جس نے انہیں مرکزی حکومت میں وزیر مملکت بننے کا موقع دیا ہے … اس پارٹی کو یہ الیکشن کے میدان میں جھونک رہے ہیں… لیکن خود دور رہیں گے… اس پارٹی کے امیدواروں کے حق میں انتخابی مہم چلائیں گے‘ یہ فیصلہ بھی کریں گے کہ اس پارٹی کا کون امیدوار ہو گا اور … اور کون نہیں … حتیٰ کہ اپنے والد کو بھی انتخابی دنگل میں اتار دیں گے … لیکن خودالیکشن نہیں لڑیں گے… مانا کہ یہ عمرعبداللہ کا ذاتی فیصلہ ہے… لیکن کیا یہ واقعی ان کا ذاتی فیصلہ ہو سکتا ہے؟یہ کھانے یا پہننے کا معاملہ نہیں ہے جو انسان کی ذاتی پسند ہو تی ہے… یہ تو صاحب ایک سیاسی معاملہ ہے… یہ تو ایک سیاسی فیصلہ ہے کہ عمر عبداللہ اس لئے الیکشن نہیں لڑیں گے کیونکہ انہیں یو ٹی میں الیکشن لڑنا قبول نہیں ہے… اور بالکل بھی نہیں ہے ۔ اگر انہیں یہ قبول نہیں ہے تو… تو پھر ان کی جماعت کو یہ کیسے قبول ہے‘ بس اس ایک بات کو ہمیں سمجھائیے ۔کیونکہ یہ سمجھناضروری ہے ۔ہے نا؟