کسوا//
وفاقی وزیر داخلہ‘ امت شاہ نے کہا ہے کہ ہندوستانی سیکورٹی فورسز نے ہندوستانی شہریوں اور ہندوستانی فوج کے مفادات کے تحفظ کیلئے پاکستان کے زیر قبضہ کشمیر (پی او کے ) میں سرجیکل اسٹرائیک کی‘جس سے یہ پیغام گیا کہ جو بھی ہماری سرحدو کے ساتھ چھیڑے گا اسے اس کی قیمت چکانی پڑے گی ۔
شاہ ہماچل پردیش کے ہمیر پور ضلع کے نادون کسوا میں ایک انتخابی ریلی سے خطاب کر رہے تھے ، جہاں وہ نادون اسمبلی سیٹ سے بی جے پی امیدوار وجے اگنی ہوتری کیلئے حمایت مانگ رہے تھے ۔ہماچل میں ۱۲ نومبر کو اسمبلی انتخابات میں ووٹ ڈالے جا رہے ہیں۔
پاکستان کی سرپرستی میں ہونے والی دہشت گردی پر عدم فعالیت پر کانگریس پر حملہ کرتے ہوئے وفاقی وزیر داخلہ نے کہا’’دس سال تک سونیا،منموہن حکومت کے دوران عالیہ، ملیا، جمالیا ہندوستان میں داخل ہوئے اور ہمارے جوانوں کو مار ڈالا اور کانگریس میں کچھ کہنے کی ہمت نہیں تھی۔ جب مودی سرکار آئی تو پاکستان کی طرف سے ایسی کوششوں کا منہ توڑ جواب ہمارے بہادر سپاہیوں نے پاکستان کے اندر سرجیکل ہوائی حملوں کی صورت میں دیا‘‘۔
شاہ نے دعویٰ کیا کہ دنیا میں ایک نیا پیغام گیا ہے کہ کوئی بھی ہندوستانی فوج اور سرحدوں کے ساتھ چھیڑ چھاڑ نہیں کرسکتا ورنہ قیمت چکانی پڑے گی۔
آرٹیکل ۳۷۰ کے بارے میں بات کرتے ہوئے شاہ نے کہا کہ کانگریس نے ۶۰ سال حکومت کی اور سالوں تک جواہر لال نہرو کے ’تحفے‘ کو بچوں کی طرح پالتی رہی اور ہمارا کشمیر ہندوستان کے ساتھ اپنا رشتہ بنانے میں ناکام رہا۔
وفاقی وزیر داخلہ نے پارلیمنٹ میں آرٹیکل ۳۷۰ کو منسوخ کرنے کا بل لانے پر کانگریس قائدین کی انتباہ کا حوالہ دیا اور کہا کہ انہوں نے مجھے متنبہ کیا کہ اگر یہ منظور ہوئی تو خون کی ندیاں بہیں گی۔شاہ نے کہا ’’راہل بابا، خون کی ندیاں بھول جائیں، کسی میں اتنی ہمت نہیں کہ ایک چھوٹا سا کنکر بھی پھینک سکے اور ہمارا کشمیر ہندوستان کا تاج بن کر پھل پھول رہا ہے۔‘‘
مرکزی وزیر داخلہ نے کہا کہ کانگریس ایک ڈوبتا ہوا جہاز ہے جس کا کوئی سیاسی مستقبل نہیں ہے اور کانگریس۲۰۲۴کے لوک سبھا انتخابات کے بعد ہندوستانی سیاست سے باہر ہو جائے گی۔
کانگریس پر طنز کرتے ہوئیوفاقی وزیر داخلہ نے کہا کہ یہاں جھوٹ بولنے والوں کی بھرمار ہے جو ہمیشہ جھوٹے نعروں سے عوام کو بیوقوف بنانے کی کوشش کرتے ہیں اور انتخابات ختم ہونے کے بعد اپنے وعدوں کو بھول جاتے ہیں۔انہوں نے کہا کہ بی جے پی واحد پارٹی ہے جو اپنے انتخابی منشور کے تمام وعدوں کو پورا کرتی ہے اور عوام کی ترقی میں مدد کرتی ہے ۔
شاہ نے کہا کہ ہندوستان اب ترقی اور متعلقہ سرگرمیوں میں دنیا کے سرکردہ ممالک میں سے ایک بن چکا ہے ۔ اب ہم وہ اشیاء تیار کر رہے ہیں جو پہلے ہم بھاری رقم ادا کر کے بیرون ملک سے درآمد کرتے تھے ۔
وزیر داخلہ نے عوام اور عوام کی فلاح و بہبود کے لیے جئے رام ٹھاکر حکومت کی ستائش کی اور رائے دہندگان سے کہا کہ وہ بی جے پی کے حق میں ووٹ دیں تاکہ وہ اپنی مدت کو دہرائیں۔ انہوں نے وزیر اعظم مودی کی انتھک توانائی سے مسلسل کام کرنے کیلئے تعریف کی اور کہا کہ ہمیں ملک اور ریاستوں پر حکومت کرنے کیلئے ایسے لوگوں کی ضرورت ہے ۔