سرینگر//
باغ دلا ور خان نرسنگ کالج کے طلبا نے بدھ کے روز یہاں پریس کالونی میں جمع ہوکر اپنے مطالبات کے حق میں احتجاج درج کیا۔
احتجاجی ’ہماری مانگیں پوری کرو‘،’ ہمارا مستقبل خطرے میں ہے ‘ جیسے نعرے لگارے تھے اور انہوں نے ہاتھوں میں پلے کارڈس بھی اٹھا رکھے تھے جن پر یہی نعرے درج تھے ۔
ایک احتجاجی طالبہ نے میڈیا کے ساتھ بات کرتے ہوئے کہا کہ ہمارے کالج کو محکمہ ہائر ایجوکیشن چلا رہا تھا لیکن اب اس کو محکمہ ہیلتھ ایجوکیشن کے سپرد کیا گیا ہے ۔انہوں نے کہا کہ اس سلسلے میں تین ماہ قبل ایک نوٹس جاری کی گئی ہے لیکن اس نوٹس کو ابھی تک عملی شکل نہیں دی گئی ہے ۔
موصوفہ نے کہا کہ محکمہ ہیلتھ ایجوکیشن کے تحت چلنے والے کالجوں کی سالانہ فیس ہمارے کالج سے بہت کم ہے ۔انہوں نے کہا کہ محکمہ ہیلتھ ایجوکیشن کے تحت چلنے والے کالجوں کی ایڈمیشن فیس دس ہزار روپیے ہے جبکہ ہمارے کالج کی داخلہ فیس۷۰ہزار روپیے ہے ۔
ایک اور احتجاجی طالبہ نے کہا کہ ہمارا اگر کوئی مسئلہ ہے تو ہمیں اس کیلئے کس کو اپروچ کرنا ہے یہ ہمیں معلوم ہی نہیں ہے ۔انہوں نے کہا کہ ہمارے کالج کی فیس کافی زیادہ ہے جس کی ادائیگی ایک عام گھرانے سے تعلق رکھنے والے طالب علم کیلئے مشکل ہے ۔