جنوبی کشمیر میں ۴ جنگجو ہلاک

سرینگر//
پولیس کاکہنا ہے کہ جنوبی کشمیر کے اونتی پورہ اور سم تھن بجبہاڑہ میں سیکورٹی فورسز کے ساتھ تصادم آرائیوں میں لشکر طیبہ کے ایک کمانڈر سمیت چار جنگجوؤں کو ہلاک کیا گیا ہے ۔
ایڈیشنل ڈائریکٹر جنرل آف پولیس کشمیر رینج وجے کمار نے بتایا کہ اونتی پورہ میں سیکورٹی فورسز کے ساتھ معرکہ آرائی میں ایک غیر ملکی سمیت تین ملی ٹینٹ مارے گئے۔انہوں نے بتایا کہ ایک جنگجو کی شناخت مختیار بٹ کے بطور ہوئی جو تین اہلکاروں کے قتل میں ملوث تھا۔
پولیس ریکارڈ کے مطابق مارے گئے جنگجوکا تعلق کالعدم دہشت گرد تنظیم حزب المجاہدین سے تھا اور وہ پولیس/ سکیورٹی فورسز پر حملوں اور شہریوں پر مظالم سمیت دہشت گردی کے کئی مقدمات میں ملوث تھا۔
پولیس کے ایک ترجمان نے بتایا کہ جنوبی کشمیر کے کھانڈے محلہ اونتی پورہ میں ملی ٹینٹوں کی موجودگی کی اطلاع موصول ہونے کے بعد سیکورٹی فورسز نے منگل کی شام علاقے کو محاصرے میں لے کر تلاشی آپریشن شروع کیا۔انہوں نے کہاکہ سیکورٹی فورسز کے اہلکار جوں ہی مشتبہ مقام کے نزدیک پہنچے تو وہاں پر موجود جنگجووں نے حفاظتی عملے پر اندھا دھند فائرنگ شروع کی چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا جس دوران کافی دیر تک دوبدو گولیوں کا تبادلہ شروع ہوا۔
معلوم ہوا ہے کہ گولیوں کا تبادلہ تھم جانے کے بعد سیکورٹی فورسز نے تصادم کی جگہ تین ملی ٹینٹوں کی لاشیں برآمد کیں جن میں سے ایک کی شناخت مختیار بٹ کے بطور کی گئی ہے جو کہ لشکر طیبہ کا ایک کمانڈر تھا۔
ایڈیشنل ڈائریکٹر جنرل آف پولیس کشمیر رینج وجے کمار نے بتایا کہ اونتی پورہ کے کھانڈے محلہ میں سیکورٹی فورسز نے تین انتہائی مطلوب ملی ٹینٹوں کو ہلاک کیا۔انہوں نے بتایا کہ ہلاک شدگان میں سے ایک کی شناخت مختیار بٹ کے بطور ہوئی جو سیکورٹی فورسز کو کئی کیسوں میں مطلوب تھا۔انہوں نے کہاکہ جاں بحق ملی ٹینٹ اسسٹنٹ سب انسپکٹر سمیت تین اہلکاروں کے قتل میں ملوث تھا جبکہ وہ عام شہریوں کو تشدد کا نشانہ بنانے کی کارروائیوں میں بھی پیش پیش تھا۔اے ڈی جی پی کے مطابق علاقے میں تلاشی آپریشن ہنوز جاری ہے۔
علاوہ ازیں پولیس نے عوام سے پر زور اپیل کی ہے کہ وہ جائے تصادم پر جانے سے تب تک گریز کیا کریں جب تک اسے پوری طرح سے صاف قرار نہ دیا جائے کیونکہ پولیس اور دیگر سلامتی ادارے لوگوں کے جان ومال کی محافظ ہے لہذا لوگوں کی قیمتی جانوں کو بچانے کیلئے پولیس ہر ممکن کوشش کرتی ہے۔