اگر آپ کی سمجھ میں آگیا ہے تو ہمیں بھی سمجھائیے کہ… کہ آخر یہ سمارٹ میٹر ہے کیا چیز … چیز ہے یا کوئی نا چیز؟وہ کیا ہے کہ جب کشمیر میں ابھی یہ میٹر نصب نہیں کئے گئے تھے تو … تو ان کے بارے میں جو کچھ بھی کہا جارہا تھا … اس سے کشمیر کے لوگ اتنے ہی ڈر گئے جتنے وادی میں پوٹا(انسداد دہشت گردی ایکٹ) نافذ ہونے کے اعلان کے وقت ڈر گئے تھے ۔یہی وجہ ہے کہ… کہ شہر خستہ کے کئی علاقوں میں لوگ سڑکوں پر نکل آئے اور ان میٹروں کی تنصیب کیخلاف احتجاج کیا … دھرنادیا۔ہم نے تو صاحب احتجاج کیا اور نہ دھرنا دیا ۔ خاموشی سے سر تسلیم خم کرتے ہوئے اپنے غریب خانے پر سمارٹ میٹر کی تنصیب میں کوئی مزاحمت نہیں کی…ویسے کرتے بھی تو…تو کیا ہوتا ‘ لیکن … لیکن اتنا ضرور ہے کہ ہم بھی سمارٹ میٹر کی تنصیب سے ڈر گئے تھے … اور اس لئے ڈر گئے تھے کیونکہ ہمیں ڈرایا گیا تھا… کہا گیا تھا کہ سمارٹ میٹر ایسے ہی کام کرے گا جیسے موبائیل فون… جتنے کا ریچارج ہوگا ‘اتنی ہی بجلی چلے گی… ریچارج ختم تو بجلی گُل…اور دیکھئے آج چار پانچ مہینے ہو گئے … سمارٹ میٹر کی تنصیب کو پانچ چھ مہینے ہو گئے … فی الحال یہ میٹر ہی ہے… اس کا سمارٹ بننا ابھی باقی ہے کہ … کہ نہ اس میں پہلے سے ریچاج کرنا پڑتا ہے اور نہ کبھی ریچارج ختم ہونے کے بعد بجلی گُل ہو جاتی ہے… یوں سمجھ لیجئے کہ … کہ پرانے بجلی میٹر کی جگہ نیا میٹر لگ گیا ہے … اس سے زیادہ اور نہ کم … ہاں البتہ ایک فرق ضرور ہے اور وہ یہ ہے کہ پہلے والا بجلی کا میٹر گھر کے آنگن میں کہیں نصب تھا اور… اور یہ والا میٹر … سمارٹ میٹر گھر کے باہر ایستادہ بجلی کے کھمبے کے ساتھ بغل گیر ۔یہ سب دیکھ کر ہماری اس نا سمجھ ‘سمجھ میں یہ نہیں آرہا ہے اور… اور بالکل بھی نہیں آرہا ہے کہ سمارٹ بجلی میٹر لگا ہی کیوں…اس کی ضرورت ہی کیا تھی کہ… کہ جو میٹر پہلے نصب تھے ان میں کیا برائی تھی … اور جو اب لگائے جا رہے ہیںان میں کیا اچھائی ہے‘ کیاخاصیت ہے ۔اگر آپ کی سمجھ میں کچھ آگیا ہے ‘ اگر آپ کچھ سمجھ گئے ہیں تو… تو ہمیں بھی سمجھائیے کہ … کہ ہم نے بہت کوشش کی کہ ہم اس سمارٹ میٹر کوسمجھ سکیں … لیکن صاحب ہم اتنے سمارٹ کہاںجواسے سمجھ سکیں… سمارٹ میٹر میٹر کو سمجھ سکیں۔ ہے نا؟