سرینگر//
جموں کشمیر سے رشوت کی بدعت کے قلع قمع کو یقینی بنانے کیلئے انٹی کورپشن بیورو (اے سی بی) کی زور دار اور موثر مہم جاری ہے ۔
سرکاری اعداد و شمار کے مطابق اے سی بی نے جموںکشمیر میں سال رواں کے دوران اب تک رشوت خوروں کے خلاف زائد از ایک سو مقدمے درج کئے ہیں۔
تفصیلات میں کہا گیا ہے کہ اے سی بی نے جموں وکشمیر میں سال۲۰۲۲کے دوران اب تک رشوت لینے ، فنڈس میں غبن کرنے ، آمدنی سے زیادہ جائیداد ہونے وغیرہ جیسے مقدموں کے الزامات میں رشوت خوروں کے خلاف۱۱۱؍ایف آئی آر درج کئے ہیں۔
ان ایک سو گیارہ کیسوں میں سب سے زیادہ مقدمے اے سی بی پولیس اسٹیشن سرینگر میں درج کئے گئے ہیں اور اس پولیس اسٹیشن میں سال رواں کے ماہ جنوری سے ماہ ستمبر تک رشوت لینے ، غیر متناسب اثاثہ ہونے ، سرکاری عہدے کا غلط استعمال کرنے ، فنڈس میں غبن کرنے اور دیگر معاملوں کے۳۷مقدمے درج ہوئے ہیں۔
تفصیلات میں کہا گیا کہ اسی طرح سال رواں کے دوران اب تک اے سی بی پولیس اسٹیشن اننت ناگ میں۱۶کیسوں اور اے سی بی پولیس اسٹیشن بارہمولہ میں۲۷ مقدے درج ہوئے ہیں۔
اے سی بی پولیس اسٹیشن راجوری میں سب سے کم رشوت کا ایک کیس درج ہوا ہے جبکہ اے سی بی پولیس اسٹیشن اودھم پور میں تین مقدمے ، اے سی بی پولیس اسٹیشن ڈوڈہ میں سات کیسز اور اے سی بی جموں میں رشوت کے۱۳مقدمے درج ہوئے ہیں۔
جموں کشمیر میں سال رواں کے دوران اب تک محکمہ مال کے۱۶ملازم جن میں تحصیل دار، نائب تحصیلدار اور پٹواری شامل ہیں، رشوت لیتے ہوئے اے سی بی کے جال میں پھنس گئے ہیں۔
یہاں پر یہ بات بھی قابل ذکر ہے کہ نیشنل کرائم ریکارڈس بیورو (این سی آر بی) کی ایک رپورٹ کے مطابق جموں وکشمیر میں سال۲۰۲۱کے دوران آئی پی سی اور دیگر متعلقہ دفعات کے تحت بدعنوانی کے۹۴مقدمات درج کئے گئے جو گذشتہ تین برسوں میں سب سے زیادہ تھے ۔
رپورٹ میں کہا گیا کہ جموں وکشمیر میں سال ۲۰۱۸سے سال۲۰۲۰تک بدعنوانی کے معاملات میں مسلسل کمی ریکارڈ ہوئی تھی۔
این سی آر بی کی رپورٹ کے مطابق جموں و کشمیر میں سال۲۰۱۸میں بدعنوانی کے۸۲معاملے درج کئے گئے جبکہ سال۲۰۱۹میں۷۳اور سال۲۰۲۰میں۷۱مقدمے ریکارڈ کئے گئے لیکن سال ۲۰۲۱کے دوران ان کیسز کی تعداد میں اضافہ درج ہوا اور۹۴مقدمے درج ہوئے ۔
اعداد و شمار کے مطابق انٹی کورپشن بیورو، ویجی لنس اور دوسری ایجنسیوں کی طرف سے درج کئے جانے والے مقدموں میں غیر متناسب اثاثوں کے۱۵کیسوں، مجرمانہ بد دیانتی کے ۲کیس‘۲۹ٹریپ کیس اور۴۸دیگر مقدمے شامل ہیں۔