تین ماہ تک بند رہنے کے بعد سرینگر لہیہ شاہراہ ٹریفک کیلئے کھول دی گئی

سرینگر//
وادی کشمیر کو لداخ یونین ٹریٹری کے ساتھ جوڑنے والی۴۳۴کلو میٹر طویل سرینگر، لیہہ شاہراہ قریب تین مہینوں تک بند رہنے کے بعد جمعے کے روز یک طرفہ ٹریفک کی نقل و حمل کے لئے کھول دی گئی۔
اس شاہراہ پر ٹریفک کی بحالی کا فیصلہ چند روز قبل صوبائی کمشنر کشمیر پی کے پولے اور صوبائی کمشنر لداخ سوگت بسواس نے ایک میٹنگ کے دوران لیا تھا۔
سرکاری ذرائع نے بتایا کہ سرینگر، لیہہ شاہراہ پر جمعے کے روز ٹریفک کی نقل و حمل بحال کردی گئی تاہم شاہراہ پر فی الوقت یک طرفہ ٹریفک چلنے کی ہی اجازت ہے ۔
ذرائع نے کہا کہ شاہراہ پر پہلے چھوٹی گاڑیوں کو ہی چلنے کی اجازت ہے اور اس شاہراہ پر بڑی مال بر دار گاڑیوں کی نقل و حمل کے بارے میں بعد میں فیصلہ لیا جائے گا۔
مذکورہ ذرائع نے کہا کہ شاہراہ پر طاق دنوں کو ٹریفک سرینگر سے لیہہ تک چلے گا جبکہ جفت دنوں کو لیہہ سے سرینگر ٹریفک کو چلنے کی اجازت ہوگی۔
ذرائع نے کہا کہ بارڈر روڈس آرگنائزیشن جو اس روڈ کی دیکھ بھال کرنے کا ذمہ دار دارہ ہے ، کی طرف سے برف ہٹانے کے بعد ہی اس شاہراہ کو کھول دیا گیا ہے ۔