بجٹ تمام ضرورتوں کو پورا کریگا:سنہا

جموں//
لیفٹیننٹ گورنر(ایل جی)‘ منوج سنہا نے یونین ٹریٹری کے بجٹ برائے سال۲۳۔۲۰۲۲کو ا ترقی پر مبنی بجٹ قرار دیتے ہوئے کہا کہ یہ بجٹ جموں کشمیر کے لوگوں کی تمام ضرورتوں اور خواہشوں کو پورا کرنے والا بجٹ ہے ۔
سنہا نے کہا کہ اس بجٹ میں تمام پہلوؤں کو مدنظر رکھا گیا ہے اور بجٹ جموںکشمیر انتظامیہ کی امن و ترقی کیلئے کی جا رہی کاوشوں کو بھی دہراتا ہے ۔
لیفٹیننٹ گورنر نے ان باتوں کا اظہار جمعے کے روز ایک پریس کانفرنس سے خطاب کرنے کے دوران کیا۔
سنہانے کہا’’جموں کشمیر کا بجٹ برائے سال۲۳۔۲۰۲۲یہاں کے لوگوں کی تمام ضرورتوں اور خواہشوں کو پورا کرنے والا بجٹ ہے یہ بجٹ یونین ٹریٹری انتظامیہ کی امن و ترقی کیلئے کی جا رہی کاوشوں کو بھی دہرا رہا ہے‘‘۔ان کا کہنا تھا کہ اس بجٹ کا بنیادی مقصد جموں کشمیر میں ترقی اور قیام امن کو یقینی بنانا ہے ۔
لیفٹیننٹ گورنرنے کہا کہ یہ ترقی پر مبنی بجٹ ہے اور اس میں تمام پہلوؤں کو مد نظر رکھا گیا ہے ۔انہوں نے کہا کہ اس بجٹ سے تمام شعبوں کو فائدہ پہنچے گا اور کسی کے ساتھ کوئی بھید بھاؤ نہیں ہوگا۔
سنہانے کہا کہ باغبانی اور سیاحت ہماری توجہ کے بنیادی مرکز ہوں گے ۔انہوں نے کہا کہ شعبہ سیاحت جموں کشمیر کے اقتصادیات کیلئے ریڑھ کی ہڑی کی حیثیت رکھتی ہے اور ہم اس شعبے کو نئی بلندیوں تک لے جانے کو ہر حال میں یقینی بنائیں گے ۔
لیفٹیننٹ گورنرنے کہا کہ بجلی سیکٹر بھی ہماری توجہ کا خاص مرکز رہے گا جو گذشتہ کئی دہائیوں سے ٹھیک نہیں ہے ۔ان کا کہنا تھا کہ اگلے چار برسوں کے دوران جموں وکشمیر میں زائد از ضرورت بجلی دستیاب ہوگی۔
سنہا نے کہا کہ سال رواں کے دوران محکمہ بجلی سرینگر اور جموں اضلاع میں چھ لاکھ سمارٹ میٹرس نصب کرنے والا ہے تاکہ بجلی کی چوری کی روک تھام کو یقینی بنایا جاسکے ۔
لیفٹیننٹ گورنر کا مزید کہنا تھا کہ امسال ماہ ستمبر میں چناب وادی میں تعمیر ہونے والا دنیا کا سب سے بڑا ریل برج بھی مکمل ہوگا جو وادی کشمیر کو کنیا کماری سے جوڑے گا۔
قابل ذکر ہے کہ مرکزی وزیر خزانہ نرملا سیتا رمن نے ۱۷مارچ کو پارلیمنٹ میں جموں وکشمیر کیلئے۴۲ء۱لاکھ کروڑ روپیوں کا بجٹ پیش کیا۔