کانگریس صدر کے عہدہ کے انتخاب میں کھڑگے اور تھرور آمنے سامنے

نئی دہلی//
کانگریس صدر کے عہدے کیلئے کاغذات نامزدگی کی جانچ کے آخری دن آج دو امیدواروں ملکارجن کھڑگے اور ششی تھرور کے کاغذات نامزدگی درست پائے گئے ہیں اور اب انتخاب میں یہ دونوں امیدواررہ گئے ہیں۔
ہفتہ کو یہ اطلاع دیتے ہوئے کانگریس الیکشن ڈپارٹمنٹ کے انچارج مدھوسودن مستری نے کہا کہ کاغذات نامزدگی کی جانچ کا کام مکمل ہو گیا ہے ۔ تحقیقات کے دوران جھارکھنڈ کے کے این ترپاٹھی کا فارم تجویز کنندگان کے دستخط نہ ملنے اور دیگر وجوہات کی وجہ سے منسوخ کر دیا گیا ہے ۔
مستری نے کہا کہ کانگریس صدر کے انتخاب کے لیے محکمہ انتخاب کو کل۲۰فارم موصول ہوئے ہیں، جن میں سے چار فارم دستخطوں کے میچ نہ ہونے اور دستخطوں کی تکرار جیسی دیگر وجوہات کی وجہ سے مسترد کر دیے گئے ہیں۔
مستری نے بتایا کہ اب صرف دو امیدوار کھڑگے اور تھرور میدان میں رہ گئے ہیں۔ کاغذات نامزدگی۸؍اکتوبر تک واپس لیے جاسکتے ہیں اور واپس نہ لینے کی صورت میں۱۷؍اکتوبر کو ووٹنگ ہوگی۔