ایس ایس بی بھرتی گھوٹالہ:پنچایت اکاؤنٹ اسسٹنٹ کا پرچہ بھی لیک ہونے کا انکشاف، او ایم آر شیٹس بھی تبدیل

سرینگر//
سروسز سلیکشن بورڈ(ایس ایس بی) کی جانب سے ماضی میں لئے گئے امتحانات سوالات کے گھیرے میں آچکے ہیں، ایس آئی، ایف اے اے کے بعد سی بی آئی کو تحقیقات کے دوران معلوم ہوا ہے کہ پنچایت اکاونٹ اسسٹنٹ امتحانات کے پرچے بھی قبل از وقت لیک کئے گئے ہیں۔
معلوم ہوا ہے کہ سروسز سلیکشن بورڈ کے سابق تین سینئر آفیسران کا نام سامنے آیا ہے اور اُنہیں کسی بھی وقت گرفتار کرنے کا امکان ہے ۔
ذرائع نے بتایا کہ مذکورہ تین سینئر آفیسران نے او ایم آر شیٹس کو ہی تبدیل کیا اوراس طرح سے محنتی اور قابل طلبا کی اُمیدوں پر پانی پھیر ا گیا۔
اس بات کا بھی انکشاف ہوا ہے کہ فارسٹرس اسامیوں کو پُر کرنے کی خاطر لئے جانے والے امتحان کے لئے چار کروڑ روپیہ کا سودا کیا گیا تھا۔
جموں وکشمیر سروسز سلیکشن بورڈ کے بعض سابق آفیسران اور جونیئر لیول کے ملازمین نے قابل اور محنتی اُمیدواروں کے تئیں ایسی گھناؤنی حرکت کی کہ اُنہیں تاریخ بھی معاف نہیں کرئے گی۔
ذرائع کا کہنا ہے کہ سی بی آئی کی ابتدائی تحقیقات میں پتہ چلا ہے کہ سروسز سلیکشن بورڈ کے سابق تین سینئر آفیسران پرچے فروخت کرنے میں براہ راست ملوث ہیں ، اتنا ہی نہیں بلکہ او ایم آر شیٹس کو بھی تبدیل کیا گیا ہے ۔
سی بی آئی ذرائع کے مطابق او ایم آر شیٹس کا پتہ تب چلا ، جب امتحانی مرکز میں تفتیش کاروں کے دستخط ایس ایس بی کے پاس دستیاب او ایم آر شیٹس کے ساتھ میل ہی نہیں کھا رہے تھے جس کا واضح مطلب ہے کہ امتحانی مراکز میں پرچہ مکمل ہونے کے بعد تفتیش کاروں کے دستخط شدہ او ایم آر شیٹس کو تبدیل کردیا گیا تھا اور کسی اور نے ہی شیٹس پر دستخط کئے تھے ۔
او ایم آر شیٹس کو تبدیل کرنے کے بارے میں کسی کو پتہ ہی نہیں چلتا اگر سی بی آئی کو اس کیس کی تحقیقات کا کام سپرد نہ کیا گیا ہوتا۔
ذرائع کا کہنا ہے کہ ماضی میں سروسز سلیکشن بورڈ کی جانب سے جتنے بھی امتحانات لئے گئے وہ سب اب سی بی آئی کے راڈار پر ہے اور اُن امتحانات کے پرچے قبل از وقت افشاں کرنے کو بھی خارج از امکان قرار نہیں دیاجارہا ہے ۔
تحقیقات کے دوران یہ بات بھی سامنے آئی کہ پیپر لیک ہونے کا معاملہ زیادہ تر جموں خط تک ہی محدود تھا کیونکہ پرچہ لیک کرنے والے تمام افراد اکھنور، کانہ چیک اور دیگر کچھ علاقوں سے تعلق رکھتے ہیں۔
ذرائع نے بتایا کہ سی بی آئی جلد ہی ایک موجودہ ممبر اور دو اُس وقت کے عہدیداروں کو تحقیقات کی خاطر طلب کریں گے جنہیں پیپر لیک اسکنڈل کے بعد ایس ایس بی سے نکال دیا گیا تھا کیونکہ او ایم آر شیٹس کو تبدیل کرنے میں ان کا ہاتھ سامنے آیا ہے ۔
ذرائع نے یہ بھی بتایا کہ سی بی آئی کے آفیسران اس کام میں جٹ گئے ہیں کہ کتنے اور او ایم آر شیٹس کو تبدیل کرکے منظور نظر رکھنے والے اُمیدواروں کو کامیاب قرار دیا گیا تھا۔