دو نا بالغ بہنوں کو جنسی طور پر ہراساں کرنے کے الزام میں نجی اسکول کا پرنسپل گرفتار

پلوامہ//
جنوبی کشمیر کے ضلع پلوامہ میں ایک نجی اسکول کے پرنسپل کو مبینہ طور پر اپنے ہی تعلیمی ادارے کی دو نابالغ طالبات، جو کہ آپس میں بہنیں بھی ہیں‘ کو جنسی ہراسانی کے الزام میں گرفتار کر لیا گیا ہے۔
ضلع پلوامہ میں ہی اس طرح کا ایک اور شرمناک واقعہ پیش آیا ہے جس میں ایک والد نے مبینہ طور اپنی دو نابالغ بچیوں کو جنسی تشددد کا نشانہ بنایا۔ پولیس نے اسے بھی گرفتار کر لیا۔
پولیس کے ایک اعلیٰ افسر نے اس حوالے سے تفصیلات فراہم کرتے ہوئے کہا کہ پولیس کو، دو الگ الگ، شکایات موصول ہوئیں جس کے بعد پلوامہ پولیس نے کارروائی کرتے ہوئے دونوں واقعات کے کلیدی ملزمین کی فوری طور گرفتار کرکے تحقیقات شروع کر دی۔
پولیس افسر نے مزید کہا کہ متاثرین کا طبی معائنہ کرایا گیا ہے جن کی رپورٹ آنی باقی ہے۔
پولیس افسر کا مزید کہنا تھا کہ دونوں کیسوں کی مکمل چھان بین کی جا رہی ہے تاکہ ان کیسوں کے حوالے سے دیگر حقائق کا پتہ چل سکے۔
دریں اثناء جموں کشمیر پولیس نے گزشتہ روز شمالی کشمیر کے بارہمولہ ضلع کے بونیار علاقے میں ایک شخص کو اسی طرح کے الزامات کے تحت گرفتار کیا گیا۔ اْس پر بھی اپنی بیٹی کے ساتھ جنسی ہراسانی کا الزام ہے۔