جموں/10 ستمبر
جموں کشمیر کے قصبہ راجوری میں حکام کی طرف سے عائد پابندیوں کو ہٹانے کے بعد ہفتے کے روز معمولات زندگی بحال ہوگئے ۔
بتادیں کہ دو گروپوں کے درمیان اراضی تنازعے کے پیش نظر ضلع مجسٹریٹ راجوری نے قصبے میں سی آر پی سی کے دفعہ144 کے تحت جمعے کے روز احتیاطی طور پر پابندیاں کی تھیں۔
ذرائع کے مطابق پابندیوں کے پیش نظر قصبے میں کرفیو جیسا ماحول تھا اور تمام تر بازار و کاروباری سرگرمیاں معطل ہوئی تھیں۔
سرکاری ذرائع نے بتایا کہ قصبے میں جمعے کے روز امن کا موحول قائم رہنے کے پیش نظر حکام نے ہفتے کے روز پابندیوں کو ہٹا دیا۔
ذرائع نے کہا تاہم حساس علاقوں میں پولیس اور سیکورٹی فورسز کی اضافی نفری تعینات ہے ۔
دریں اثنا ایگزیکٹیو مجسٹریٹ (فرسٹ کلاس) راجوری نے سی آر پی سی کی دفعہ 145 کے تحت رام پور گا¶ں میں زمین کے اس ٹکڑے (جو باعث تنازعہ ہے ) کو عدالت کی طرف سے کوئی فیصلہ آنے تک منسلک کرنے کا حکم دیا ہے ۔
