بنگلہ دیش میں زیر تعلیم کشمیر طالبہ چھت سے کر گر فوت

سرینگر//
جموں کشمیر کے سابق وزرائے اعلیٰ عمر عبداللہ اور محبوبہ مفتی نے وزارت امور خارجہ سے بنگلہ دیش میں فوت ہونے والی کشمیری طالبہ کی لاش واپس لانے میں مدد کرنے کی اپیل کی ہے ۔
بتادیں کہ جنوبی کشمیر کے ضلع اننت ناگ کے بجبہاڑہ سے تعلق رکھنے والی ایم بی بی ایس طالبہ خوشبو منظور دختر منظور احمد کی بنگلہ دیش کے خواجی یونس علی میڈیکل کالج میں مبینہ طور پر کالج ہوسٹل سے گر جانے سے موت واقع ہوئی ہے ۔
نیشنل کانفرنس کے صدر اور سابق وزیر اعلیٰ عمر عبداللہ نے اس سلسلے میں وزارت امور خارجہ سے متوفی طالبہ کی لاش واپس لانے میں مدد کرنے کی اپیل کی ہے ۔انہوں نے اپنے ایک ٹویٹ میں کہا’’میں وزارت امور خارجہ سے اس سلسلے ممکنہ مدد کرنے کی گذارش کرتا ہوں‘‘۔
عمر کا ٹویٹ میں مزید کہنا تھا’’پسماندگان خوشبو کے جسد خاکی کو واپس لانے کیلئے بے قرار ہیں تاکہ وہ اس کو اجنبیوں کے بجائے اپنے رشتہ داروں اور دیگر احباب کی موجودگی میں اپنے آبائی علاقے میں دفن کر سکیں۔‘‘
پی ڈی پی صدر اور سابق وزیر اعلیٰ محبوبہ مفتی نے اس ضمن میں اپنے ایک ٹویٹ میں کہا ہے’’بنگلہ دیش کے خواجہ یونس علی میڈیکل کالج میں ایم بی بی ایس کرنے والی خوشبو منظور ایک حادثے میں از جان ہوگئی‘‘۔انہوں نے کہا’’میری وزارت امور خارجہ سے گذارش ہے کہ وہ اس کو لاش کو جتنا ممکن ہوسکے اتنا جلد ملک واپس لائے ‘‘۔
طالبہ کے اہل خانہ نے بھی وزارت امور خارجہ اور جموں وکشمیر کے لیفٹیننٹ گورنر منوج سنہا سے لاش واپس لانے میں مدد کرنے کی اپیل کی ہے ۔