امرناتھ گھپا کی طرف جانے والے بالتل اور چندن واری روٹس بی آر او کے حوالے

جموں//
حکومت نے ایک اہم فیصلہ لیتے ہوئے شری امرناتھ پوتر گھپا کی طرف جانے والے ضلع گاندربل کے بالتل اور ضلع اننت ناگ کے چندن واری روٹس کو مرمت، دیکھ ریکھ اور دوسرے انتظامات کیلئے بارڈر روڈس آرگنائزیشن (بی آر او) کے حوالے کیا ہے ۔
پرنسپل سکریٹری محکمہ تعمیرات عامہ (آر اینڈ بی) شلیندر کمار نے اس سلسلے میں ایک حکمنامہ جاری کیا ہے ۔
حکمنامے میں کہا گیا ہے کہ حکومت نے مقدس گھپا کی طرف جانے والے چندن واری، شیش ناگ، پنچترنی ٹریک اور بالتل ٹریک کو دیکھ ریکھ‘ مرمت اور دیگر انتظامات کرنے کیلئے بی آر او کو منتقل کرنے کو منظوری دی ہے ۔
بتادیں کہ بی آر او کو پہاڑیوں پر بنے دشوار گذار راستوں کی دیکھ ریکھ اور مرمت کرنے میں مہارت حاصل ہے ۔
علاوہ ازیں حکومت نے رنگا تا بالتل روڈ بشمول نلگراتھ تا وائی جنکشن کو بھی ترقی و مرمت کیلئے بی آر او کے حوالے کرنے کو بھی منظوری دی ہے ۔
جنوبی کشمیر میں واقع شری امرناتھ جی پوتر گھپا کی طرف جانے والے دونوں بالتل اور چندن واری ٹریکس پر سفر کرنا انتہائی دشوار گذار ہے اور بعض اوقات لینڈ سلائیڈنگ یا برف باری کے باعث یہ روٹس بند ہوجاتے ہیں۔
بی آر او کے پاس ایسے روٹس کو قابل آمد و رفت بنانے کیلئے ماہرین کے علاوہ جدید ساز و سامان بھی موجود ہے ۔
ذرائع کا کہنا ہے کہ بی آر او کو یہ روٹس حوالے کرنے سے ان پر یاتریوں کی آمد و رفت میں کافی سہولیت اور آسانی آئے گی۔
قابل ذکر ہے کہ امسال زائد از ساڑھے تین لاکھ یاتریوں نے شری امرناتھ جی پوتر گھپا کا درشن کیا۔
۴۴دنوں پر محیط یہ یاترا۳۰جون سے شروع ہوئی اور گیارہ اگست کو رکھشا بندھن کے مقدس تہوار کے موقعے پر اختتام پذیر ہوئی۔