کشتواڑ حادثہ: ۸؍افراد کی بیک وقت نماز جنازہ ادا

جموں//
کشتواڑ حادثے میں جاں بحق ہوئے۸؍افراد کی بیک وقت نماز جنازہ ادا کی گئی جس دوران رقعت آمیز مناظر دیکھنے کو ملے ۔
معلوم ہوا ہے کہ آہوں اور سسکیوں کے بیچ جاں بحق افراد کو سپرد خاک کیا گیا ۔
یو این آئی اردو کے نامہ نگار نے بتایا کہ بدھ کے روز کشتواڑ کے دور اُفتادہ گاوں میں آٹھ افراد کی بیک وقت نماز جنازہ ادا کی گئی۔انہوں نے کہاکہ کشتواڑ میں پیر کے روز ٹاٹا سومو گہری کھائی میں جاگری جس وجہ سے اُس میں سوار آٹھ افراد از جان ہوئے ۔
اُن کے مطابق ہلاک شدگان ایک ہی گاؤں کے رہنے والے تھے اور جوں ہی اُن کی لاشیں وہاں پہنچائی گئیں تو قیامت صغریٰ بپا ہوئی اور پورا گاوں ماتم کدے میں تبدیل ہوا۔
نامہ نگار نے بتایا کہ ہزاروں لوگوں کی موجودگی میں آٹھ افراد کی بیک وقت نماز جنازہ ادا کی گئی جس کے بعد انہوں نے پُر نم آنکھوں کے ساتھ سپرد خاک کیا گیا۔انہوں نے بتایا کہ لاشوں کو دیکھ کر مرد و زن زار و قطار رو رہے تھے اور پورا گاوں میں ماتم میں تبدیل ہوکر رہ گیا ۔
مقامی لوگوں نے بتایا کہ آئے روز کشتواڑ میں حادثات پیش آرہے ہیں اور حکام صرف بلند بانگ دعوئے کر رہے ہیں۔انہوں نے بتایا کہ شاہراہوں کی مرمت کی خاطر ہم پچھلے کئی سالوں سے چیخ رہے ہیں، لیکن اعلیٰ عہدوں پر فائز آفیسران کو انسانی جانوں کی بھی کوئی پرواہ نہیں ہے ۔
اس دوران وزیر اعظم نریندر مودی نے حادثے میں جانی نقصان پر گہرے رنج و غم کا اظہار کیا ہے ۔
مودی نے حادثے میں ہلاک ہونے والوں کے لواحقین کو وزیر اعظم کے قومی ریلیف فنڈ سے ہر ایک کو۲لاکھ روپے اور زخمیوں کو۵۰ہزارروپے دینے کا بھی اعلان کیا ہے ۔
وزیر اعظم کے دفتر نے بدھ کو ٹویٹ کیا’’کشتواڑ میں حادثے سے غمزدہ ہوں۔ سوگوار خاندانوں سے میری تعزیت۔ میری پرارتھنا ہے کہ زخمی جلد صحت یاب ہو جائیں۔ پی ایم این آر ایف سے ہر مرنے والے کے لواحقین کو۲لاکھ روپے دیئے جائیں گے اور ہر زخمی کو۵۰ہزارروپے کی امدادی رقم دی جائے گی‘‘۔
واضح رہے کہ منگل کو کشتواڑ کے چتارو علاقے میں ایک کیب کے حادثے کا شکار ہوجانے سے آٹھ مسافر ہلاک اور تین دیگر زخمی ہو گئے تھے ۔